Programê ke Şaredarîya Şaristanê Girdî ya Amedî organîze kerdo, tede wendekarê lîse, Cayê Daristanî yê Kent 2 de ke Bulwarê Firatî ser o yo, şitilî ronayî.
Serekîya Daîreya Park û Baxçeyan, seba Amedêko hîna kesk xeylê programan bi çarçewaya waştişan ke şarî û sazgehan ra yenê, organîze kena. Çarçewaya programî de ke Serekîya Daîreya Park û Baxçeyan organîze kerdo, wendekarê ke Beşê Têkilîyanê Şarî yê Lîseya Teknîkî, Meslekî û Anadoluyî ya Namik Kemalî û yew mektebê taybetî de wanenê, Cayê Daristanî yê Kent 2 de ke Bulwarê Firatî yê qezaya Kayapinarî de yo, 135 hebî şitilê çinarê Îranî û selvîyê keweyî ronayî.
Mudirîya Şûbeyê Fîdanlîk û Darûberinkerdiş, verê aktîvîteyî cayê ke tespît bîyê, tede çalî kendî û seba ronayîşê şitilan amadeyîye kerde.
135 wendekarî beşdarê aktîvîteyî bîyî
Organîzasyonî de ke 135 wendekarî beşdar bîyî, ekîban hem seba ronayîşê şitilan hetkarîya wendekaran kerd hem zî seba weşkerdişê şitilan û weyekerdişê înan derheqê melumatî dayî.
Aktîvîteyo ke seba hîşyarîya derûdorî virazîya, tede wendekarî mamosteyanê xo reyde çalanê ke verê cû ameyê kendene, tede şitilî ronayî û dima awe daye înan.
Xebatê Darûberinkerdişî do dewam bikerê
Serekîya Daîreya Park û Baxçeyan, demserra Darûberinkerdişî de cayanê cîya-cîyayan ê bajarî de peyerayîr, refuj, çatrayîr û parkanê ke tespît bîyê, tede tewirê cîya-cîyayan û emrê cîya-cîyayan ê daran de do dewam bikero daran biresno herre.
