Komeleya Eşîra Hesenan bi daxuyaniyekê piştgirî da pêvajoyê. Serokê komeleyê Hasan Arslan diyar kir ku ji bo pêşketina pêvajoyê divê girtiyên siyasî bên berdan.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir û diyar kir ku PKKê çek dayne û xwe fesix bike. PKKê 1ê Adarê agirbest ragihandibû. PKK di 12ê Gulanê de bi daxuyaniyekê encamnameya kongreya xwe ya 12emîn eşkere kir û fesixkirina xwe ragihand. Piştî daxuyaniya PKKê gelek sazî û dezgehên cuda û gelek kes daxuyanî didin û piştgiriyê didin pêvajoyê.
‘Divê girtiyên siyasî bên berdan’
Serokê Komeleya Eşîra Hesenan a li Amedê Hasan Arslan diyar kir ku li pêşiya guhertina qanûna bingehîn tu astengî nemane û wiha got: “Em spasiya wan kesan dikin ku ji bo pêvajoyê têkoşiyan. Divê pêvajo êdî bi qanûnan li pêş bikeve. Ji bo aştî pêk were divê hemû sazî û dezgeh dest bi têkoşîna destpêka nû bikin. Em li vir bang dikin dewletê; ji bo pêşketina pêvajoyê divê êdî girtiyên siyasî bên berdan.”
