Agirî – Kesên di rûniştina yekemîn a konferansa “Girîngiya Yekîtiya Kurd” de axivîn, destnîşan kirin ku armanca wan a yekane misogerkirina yekitiyê ye û diyar kirin ku divê desthilat di pergala nû ya cîhanê de statuya Kurdan qebûl bikin.
Rûniştina yekemîn ya Konferansa “Girîngiya Yekîtiya Kurd” ku ji aliyê Însiyatîfa Yekîtiya Demokratîk ve li navçeya Bazîd a Agiriyê tê lidarxistin, dest pê kir. Di rûniştina yekemîn de nîvîskar Îhsan Colemêrgî, siyasetmedar Îkbal Dûrre û Hevberdevka Komîsyona Ziman, Çand û Hunerê ya DEM Partiyê Cemîle Tûrhalli bi moderatoriya Îlhan Tan mijara “Di Dîrokê De Bêtifaqiya Kurdan û Encamên Wê” nîqaş kirin.
‘Ez dixwazim eniya niştimanî bê bilindkirin’
Ewilî nivîskar Îhsan Colemêrgî axivî û ji cîhanê mînak û gotinên şexsiyetên mezin ên li ser yekitiyê anîn ziman. Îhsan Colemêrgî da zanîn ku Kurdan di hemû jiyana xwe ya siyasî de bi eşîrtî tevgeriya ne û tifaqek ava nekirine. Îhsan Colemêrgî diyar kir ku yek ji sedema bindestiya Kurdan baweriya Kurdan û desthilatên wan e û got: “Ol, di têkoşîna navbera gelan de çekeke giran e. Heke baweriya bindest û serdestan yek be, çeka olî di destê serdestan de ye. Ez û malbata xwe piştevaniya vê pêvajoya nû dikin û ez dixwazim eniya niştimanî bê bilindkirin. Divê hemû siyasetmedar, DEM Partî û nûnerên partiyên din amadehiya kongreyeke neteweyî bikin.”
‘Armanca me mîsogerkirina yekitiyê ye’
Dû re siyasetmedar Cemîle Tûrhalli bi zaraveya Kirmançkî axivî û bal kişand ser sedemên bêtifaqiya Kurdan. Cemîle Tûrhalli wiha got: “Werin em tifaqa xwe ji hundir ve ava bikin. Tifaq li her derê hene; ew di xwezaya me de ne. Ger tifaq li her derê hebin, çima Kurd tifaqan çênakin? Kurdistan axeke bêsînor e. Me li Lozanê dît ku hêzên hegemonîk Kurdistan parçe kirin. Di seranserê dîrokê de, hemû Kurdan xeyala yekîtiyê kirine, lê ew qet pêk nehatiye. Armanca me ya yekane ew e ku em yekîtîya xwe misoger bikin.”
‘Cudahiyên me hêza me ya herî mezin e’
Herî dawî siyasetmedar Îkbal Dûrre axivî û diyar kir ku bêtifaqî ne tenê di nava Kurdan de, di nava gelek gelên cîhanê de heye. Îkbal Dûrre, anî ziman ku divê ev yek me bêmoral neke û got: “Her parçeyek Kurdistanê xwedî taybetmendiyên cûda ne. Li Rojava federalîzm tê xwestin, li Başûr ji bo serxwebûnê referandûm hat kirin û niha jî li Bakûr entegrasyona demokratîk tê nîqaşkirin. Ev yek li gorî demê ji bo parçeyên Kurdistanê pêwîst in û divê rêz bê girtin. Her wiha em nikarin niha entegrasyona demokratîk li ser Başûr û Rojava bikin, ew çi dixwazin divê em piştgiriya wan bikin. Divê Kurd piştgiriya hev bikin û fikir, îdeolojî û hişmendiya xwe deyne aliyekê. Şewitandina çekan, mînaka hevrejiyanê ye û pêkanîna wê ya li Silêmaniyê jî gelek watedar e. Dê pergala nû ya cîhanê de gelek têgehên niha tên bikaranîn bêwate bimînin. Pirsgirêka sed dused salî di du sê mehan de nayê çareserkirin. Di pergala nû ya cîhanê de rol û cihê Kurdan gelek mezin e û divê desthilat di pergala nû ya cîhanê de statuya Kurdan qebûl bikin. Heke qebûl nekin, dê ev dewlet bibin dewletên mafyawarî. Cudahiyên me hêza me ya herî mezin e.”
