Sekretera Giştî ya Partiya Sûriyê ya Pêşerojê, Hevrîn Xelef 6 sal berê ji aliyê fermandarên Ehrar El-Şeriye Ehmed el-Hayis ve hat kuştin. Lê îro HTŞê kujer di hikûmeta demkî ya Şamê de bicih kirine û ew wekî fermandar xelat kirine.
Sekretera Giştî ya Partiya Sûriyê ya Pêşerojê Hevrîn Xelef di 12ê Cotmeha 2019an de li Qamişlo li ser Rêya Giştî ya Diwelî ya di nabera Qamişlo û Minbicê de kuştin. Fermandarê Ehrar El Şeriye, Ehmed el-Hayis û hevalên xwe li ser rêya Qamişlo û Minbicê kemîn danîn û Hevrîn Xelef û ajokarê wê kuştin.
Endazyar Hevrîn Xelef di kongreya partiya xwe ya 27ê Adara 2018an de wekî sekretera giştî hat hilbijartin. Damezrandina partiyê, destpêka merheleya nû ya dîroka Sûriyê bû. Piştî Hevrîn Xelef wekî Sekretera Giştî ya Partiya Sûriyê ya Pêşerojê hat hilbijartin, di nava salekê de gelek xebatên berbiçav kirin. Lê kesên ku hewldanên Hevrîn Xelef ên ji bo hêviya azadî û demokrasiyê dîtin, ew kirin hedef.
Kujerê Hevrîn Xelef Ehmed el-Hayis (Hatim Ebû Şeqra), yek ji fermandarên Ehrar El-Şeriye bû. Kujer Ehmed El Hayis; bi wêneyên mezûnîyetê yên li ser medyaya sanal parve kir, eşkere kir ku bi salan li Tirkiyeyê maye. Derket holê ku endamê Rêxistina Ahraruş Şarkiye ku yek ji pêkhateyên Artêşa Milî ya Sûriyê ya girêdayî dewleta Tirk e. Derketibû holê ku Ebu Hatim Şakra, beriya niha jî bi navê Ahmed Îhsan Fayyad
El-Hays, Zanîngeha Artûklû ya Mêrdînê qedandiye.
Ehmed el-Hayis (Hatim Ebû Şeqra), endamê SMO bû. Rayedarên Tirkiyeyê jî aşkere diyar dikin ku SMO girêdayî wan e. SMO ji aliyê Neteweyên Yekbûyî (NY) ve bi sûcên şer tê tawanbarkirin. Piştî hikûmeta Şamê di 8ê Kanûna 2024an de hilweşiya, HTŞê dest danî ser hikûmeta Şamê. Piştî hikûmet hilweşiya, HTŞê di 5ê gulana 2025an de li Sûriyeyê hikûmeta demkî ava kir. Kujerê Hemrîn Xelef, Ehmet el-Hayis jî wekî fermandarê Firqeya 86an li Dêra Zor, Reqa û Hesekê tayîn kirin. Li gel ku kujer Ehmet el-Hayis 6 sal berê Sekrereta Partiya Sûriyê ya Siberojê kuşt jî, li şûna bê darizandin û cezakirin, îro em dibînin ku wekî fermandar û erkdar di hikumeta Şamê de cih digire.
Sekretera Giştî ya Partiya Sûriye ya Pêşerojê Hevrîn Xelef û ajokarê wê Ferhad Remedan bi destê xiyaneta çeteyên Sûriyê bi piştevaniya Tirkiyeyê hat kuştin. Hevrîn Xelef kesayeteke rewşenbîr û afrîner bû. Destpêkê di mecala perwerde û fêrkirinê de dixebitî. Xewna Hevrînê, jiyana hevbeş di nava tevahî pêkhateyên gelê Sûriyê de bû.
‘Êrîşek tirsonek bû’
Meclisa Jinan a Sûriye a Bakur û Rojhilatê Sûriyê; destnîşan kir ku bilindbûna asta êrîşên Tirkiyê li ser herêmên Bakur û Rojhilatê Sûriyê kerwanên şehîdan ji sivîlên bê guneh zêde dibin û got: “Hêzên artêşa Tirk a dagirker di êrîşek tirsonek û xeder de erebeya wê li ser rêya navdewletî (Hesekê –Heleb) kirin hesed. Em soza xwe bi hevgirtina gel û hêzên xwe yên ku mirovahî hemû ji terorê parast û hîna diparêze dubare dikin.
‘Hemû nirx pîvan temsîl dikir’
Kongra Star ji bo Sekretera Giştî ya Partiya Sûriya Pêşerojê Hevrîn Xelef wiha dibêje: “Hevrîn Xelef yek ji pêşengên jin a şoreşa Rojava û Bakur û Rojhilatê Sûriyê bû. Di şexsê xwe de hemû nirx û pîvanên vê şoreşê temsîl dikir. Ji demokrasiyê bigire heya yekitiya gelan, ji edaletê bigire heya vîna xweser, Hevrîn Xelef wan pîvanan bi rastî jî pratîze dikir. Ji ber vê jî diçû ku derê bi germahî, ji dilî û dirustiya xwe li ser derdorê bandor dikir û dihat hezkirin. Berî her tiştî wek jina Kurd a birêxistinî, hem xwe bi pêş dixist hem jî hêz dida jinan. Bi vî awayî bû pêşengeke vê şoreşê, bû pêşengeke jin.”
Kongra Star destnîşan dike ku Hevrîn Xelef tevî hemû zor û zehmetiyan bi dilsozî erka xwe pêk dianî û bi keda xwe pêşketinên mezin ava kiriye û van nirxandinan dike: “Hevrîn Xelef, ji ber ku jineke pêşeng ên vê şoreşê bû hat hedefgirtin. Dewleta Tirk a dagirker di zanebûna rola pêşeng a tevgera azadiya jinan de ye. Baş dizane ku hêza birêxistinî ya jinan dînamîka herî xurt a şoreşa sedsala 21ê pêk tîne. Şoreşa Rojava û Bakur û Rojhilatê Sûriyê jî di cewherê xwe de şoreşa jinan e û xwe dispêre hêza xweser a tevgera azadiya jinan.”
‘Îspat bû ku Tirkiye sivîlan dike hedef’
Tevgera Civaka Demokratîk (TEV-DEM) diyar kiribû ku Tirkiye û hevkarên xwe ji raya giştî re îsbat kirin ku ew sivîlan dike hedef û gotibû: “Em van êrîşên hovane û berberî yên Tirkiyê yên ku rêveberek sivîl ku di partiyek sivîl de kar dikir kirin hedef şermezar dikin. Ev îsbat dike ku dewleta Tirk a faşîst vîna tevahiya partî, pêkhate û sivîlan dike hedef.”
Hevrîn Xelef: Em guherdina demografiya Sûriyê qebûl nakin
Sekretera Giştî ya Partiya Sûriya Pêşerojê Hevrîn Xelef di 18ê Gulana 2018an de diyar kiribû ku partiya wan wê hewl bide ku careke din hezkirinê di nava gelê Sûriyê de zindî bike û gotibû: “Partiya me bi tu awayî guhertina demografî ya li Sûriyê qebûl nake.”
Hevrîn Xelef beriya bê kuştin ji ANHA re axivîbû û wiha gotibû: “Aloziya Sûriyê ev çend sal in dewam dike. Careke din çandiniya hezkirin û hevdûqebûlkirinê di nava gelê Sûriyê de, armanca me ya tekoşînê ye. Em ê rihê ku gelê Sûriyê beriya 8 salan bi wê serî hilda vegerîn in. Partiya me di tekişîna xwe de danûstendinê esas digre. Bi vê yekê jî dê aloziya Sûriyê ber bi çareseriyê ve her e. Em van siyasetan qebûl nakin. Em dagirkirina ji derve bi tu awayî qebûl nakin. Em dikarin Tirkiyê ku em wekî cîran rêzê jê re digirin bibîr bixin. Em doz dikin ku ev siyaset werin kêmkirin.”
Di 27ê Adara 2018an de Partiya Sûriya Pêşerojê kongreya xwe ya damezirîner bi beşdarbûna 880 delegeyan li bajarê Reqayê lidar xist. Di kongreyê de Hevrîn Xelef wekî Sekretera Giştî hatibû hilbijartin.
