Navenda Nûçeyan – Kurd û dostên kurdan dê di 13ê Îlonê de ji çar aliyên Ewropayê, bi taybetî ji Almanya, Bakurê Fransayê, Swîsre, Hollanda û Belçîkayê, bimeşin bajarê Dortmundê û beşdarî 33yemîn Festîvala çand û ziman bibin. Hevseroka KON-MEDê Rûken Akça anî ziman ku dê di vê mihrîcanê de sînorên ku 100 sal berê hatine xêzkirin ji holê rakin.
Kurd û dostên Kurdan dê di pêşengiya KON-MED û 5 federasyon, meclis û pekateyên wan, dê 13ê Îlonê de 33yemîn Festîvala Çanda Kurd a Navneteweyî pêk bînin. 33yemîn Festîvala Çand û Ziman dê li bajarê Dortmund ê Elmanyayê li navnîşana ‘Remydamm/Victor-Toyka Str. 44139’ bê lidarxisitn. Dê Kurd û dostên kurdan ji
Holanda, Belçika, Fransa, Swîsre, Almanya 119 otobus hatin kirékirin. Dê gelek kes jî bi erebeyên şexsî beşdarî festîvalê bibin.
Hevseroka KON-MEDê Rûken Akça, têkildarî mihrîcana ku di 13ê Îlonê de li Almanyayê pêk bînin nirxandin kir û got: “Em ê di vê mihrîcanê sînoran rakin û bi yekbûna xwe ya di mihrîcanê de Kurdistanê li Dortmundê bikin yek parçe.
Hevseroka KON-DEMê Rûken Akça ewil li ser amadekariya Festivalê rawestiya û wiha got: “Me 6 meh berê dest bi amadekariyan kir. Me 6 meh berê serî li rayedaran da. Me ji bo stantên xwarin, vexwarin, cil û bergan û ji bo Çadira Zarok MA, Çadira Emele serlêdan kir. Dîsa ji bo dengbêjan û stranbêjan me cih diyar kir. Hemû amadekariyên me yên teknîkî temam in. Em ê di 12ê Îlonê de stantên xwe vekin. Dê gelek siyasetmedar û pêşeng amade bin. Dê hunermendên navdar beşdar bibin. Dê hunermend Nasir Rezazî û keça xwe, Ferhat Merdê û Hunermendê Rapê Azad derkevin ser dike. Ciwanên Ewropa heyranê Hunermendê Rapê Azad in. Dê xeyala ciwanan a ku li stranên hunermend Azad guhdar bikin pêk bê. Dîsa dê Hunera Mizgîn ku ji stranbêjin jin pêk tên derkevin ser dike. Dê li ser navê KNK, KCDK-E û rêxistinên civakî kes derkevin ser dikê. Dê mêvanên biyanî peşdar bibin. Em li bendê ne ku ji Îmraliyê peyam bê. Dê gelek peyam bên xwendin.”
‘Piştî banga Rêber Apo tevlêbûn pir zêde ye’
Rûken Akça, li ser cudahiya festîvalên din û ya niha rawestiya û wiha got: “Banga 27ê Sibatê mohra xwe li her tiştî xist. Li Ewropa 30 salin tevgera azadiyê di lîsteya xedexeyan de bûn. Ji ber qedexeya li ser tevgera azadiyê, komele, meclis û saziyên me nikaribûn bi hêsanî xebatê bikin. Heta niha her tim bi ser saziyên me de digirtin. Nûnerên saziyan binçav dikirin û xebat asteng dikirin. Lê piştî banga Rêber Abdullah Ocalan êdî ev astengî rabûn. Piştî bangê tevlêbûna civakê gelek zêde ye. Piştî banga Rêber Abdullah Ocalan eleqeya li hemberî festîvalê û tevlêbûna pêvajoyê gelek zêde ye. Gelê Kurd bi kelecan û meraq pêvajoyê dişopîne.
‘Enternasyonalîst fikrên Rêber Apo bêtir dixwînin’
Rûken Akça, destnîşan kir ku xebata festîvallê bi piranî bi pêşengî û alîkariya dostên kurdan tê kirin û wiha lê zêde kir: “Di meşa ciwanan bi tevlêbûna ciwanên enternasyonalîst pêk hat. Ciwanên enternasyonalîst bêtir fikrên Rêber Apo dixwînin û xwe tev li çalakiyan dikin. Di meşa ciwanan de me dît ku fikr û felsefeya Rêber Apo ji bo hemû civakên biyanî hêz û baweriyê dide.
Di xebata giştî de gelek hevalên me yên biyanî û dostên me hene.”
Gel amade ye
Rûken Akça herî dawî ev bang kir: “Gelê me amade ye. Em bawer dikin ku dê di vê pêvajoyê de destê Rêber Apo xurt bike. Ev pêvajo pir girîng e. Divê em jin, ciwan û gelê kurd yekîtiya xwe xurt bikin. Serok yekîtya gelê Kurd dixwaze. Yekîtiya gelê Kurd tam di vê demê de divê pêk bê. Em di vê mihrîcanê de vîna xwe ya yekîtyê diyar bikin. Em dibêjin 100 sal berê çawa hêzên dagirker Kurdistan kirin çar parçe, em niha bi hêz û yekitiya xwe Kurdistanê bikin yek parçe.”
