Endamê MYKê yê KKP û parlamenterê DEM Partiyê Sînan Çîftyurek di meşa ji bo Rojava de axivî û diyar kir ku Kurdan bi berxwedana xwe ruhê Qazî Mihemed şad kirine û got: “Yên ku dixwestin statuya Rojava ji holê rakin, winda kirin.”
Rêxistina Partiya Wekhevî û Demokrasiyê ya Gelan (DEM Partî) ya navçeya Payîzava ya Wanê, ji bo piştgiriya bi Rojavayê Kurdistanê li navenda navçeyê meşek li dar xist û daxuyaniyek da. Di daxuyaniyê de pankarta “Xwedîderketina Rojava xwedîderketina mirovahiyê ye, Rojava xeta me ya sor e” hat vekirin û dirûşmên “Bijî berxwedana Rojava”, “Bijî berxwedana Îmraliyê” û “Jin, jiyan, azadî” hatin berzkirin. Endamê MYKê yê Partiya Komunîst a Kurdistan (KKP) û parlamenterê DEM Partiyê Sînan Çîftyurek, hevşaderên Bajarê Mezin ên Wanê Neslîhan Şedal û Abdullah Zeydan, hevserokên DBP û DEM Partiyê yên Wanê, nûnerên saziyên sivîl û gelek welatî tev li meş û daxuyaniyê bûn.
‘Yên dixwestin sitatuya Rojava ji holê rakin, winda kirin’
Girse meşeke kin li dar xist û li ber avahiya DEM Partiyê daxuyanî da. Parlamenter Sinan Çiftyûrek li vir bi bîranîna qurbaniyên erdhêja 6ê Sibatê dest bi axaftina xwe kir. Sinan Çiftyûrek diyar kir ku Kobanê çawa duh û îro jî xwe parast, wê sibê jî statuya xwe biparêze û got: “Li Parîsê planeke qirkirina li dijî gelê Kurd hate destpêkirin. Armanca wan ew bû ku statûya Rojava bê tunekirin. Li Parîsê lihevhatineke wiha hate kirin; ‘Em ê Gazeyê nebînin, hûn jî statûya Kurdan ji holê rakin.’ Em bi sedsalan bira ne, lê li dijî me polîtîkayên wiha tên meşandin. Lê gelê Kurd li her çar perçeyên Kurdistanê û li hemû cîhanê rabû ser piyan û got, ‘Kobanê xeta sor a me ye.’ Gelê Kurd li Parîsê lihevhatina qirkirina Kurdan şikand û derbas kir. Dibe ku encam tam wekî ku em dixwazin nebibe, lê yên ku dixwestin statûya Rojava bê tunekirin winda kirin. Em ê heta dilopa xwîna xwe ya dawî xwedî li Rojava derkevin. Kurdan bi berxwedana xwe ruhê Qazî Mihemed şad kirin. Divê her kes xwedî li vê yekîtiya ku derket holê derkeve û qîmetê bide wê.”
‘Ji bo Ocalan mafê hêviyê pêk bînin’
Çiftyûrek bang li AKPê kir û wiha dawî li axaftina xwe anî: “Mafê hêviyê yê Rêzdar Abdullah Ocalan divê tavilê bê pêkanîn. Divê hemû girtiyên siyasî bên berdan û siyaseta înkarê ya sedsalî bê bidawîkirin. Ger pirsgirêka Kurd nebûya, gelo Rêzdar Ocalan dê îro li zindanê bûya? Divê rêya siyaseta demokratîk were vekirin. Em hemû dixwazin li şûna çekan siyaset biaxive. Divê Meclîs tavilê berpirsiyariya xwe pêk bîne, mafên ziman, çand û siyasî yên gelê Kurd nas bike.”
Daxuyanî bi dirûşman bi dawî bû.
