Bi hezaran Kurd û dostên Kurdan bi wesîleya salvegera Komkujiya Parîsê ya Duyemîn li pêşiya Navenda Çanda Kurd a Ahmet Kaya çalakiya bîranînê li dar xistin. Çalakgeran bêdengiya Fransayê şermezar kirin.
Kurd û dostên Kurdan Endama Konseya Rêveber a KCKê Evîn Goyî, hunermend Mîr Perwer û Abdurrahman Kizil ên ku 23ê Kanûna 2022an li paytexta Fransa Parîsê hatin qetilkirin, bi çalakiyeke girseyî bibîr anîn. Çalakî bi pêşengiya Tevgera Jinên Kurd a Ewropayê (TJK-E) pêk hat. Kurdistanî û dostên wan li ber Navenda Çanda Kurd a Ahmet Kaya li hev kom bûn û dirûşmên “Şehîd namirin”, “Jin, Jiyan, Azadî” qîriyan. Wêneyên cangoriyên herdu komkujiyên Parîsê hildan. Çalakiya bi bîr anînê heta saet 18:00an berdewam kir.
