Şaredariya Bajarê Mezin a Amedê di salvegera 29emîn wefata Eyşe Şan de bi bernameyên cûr bi cûr bi bîr anî. Di panelê hat gotin ku Eyşe Şan 900 stran derxistiye lê îro tenê 150 stranên wê aşkere ne.
Eyşe Şan di 18ê Kanûna 1996an de jiyana xwe ji dest dabû. Li ser wefata Eyşe Şan de 29 sal derbas bû. Şaredariya Bajarê Mezin, Komeleya Çand Huner û Wêjeyê ya Jinan (KASED), MA Music û Komeleya Çand û Hunerê ya Dîcleyê 29emîn salvegera wefata Eyşe Şan li Salona Çandê ya Elî Emîrî bernameya bîranîne li dar xistin. Malbata Eyşe Şan û gelek kes tev li bernameya bîranîne bûn.
Di bernameyê de ewilî panela bi navê “Jiyana muzîkê ya Eyşe Şan” hat lidarxistin.
‘Eyşe Şan yek ji pêşengê Muzîkjenê Kurdan bû’
Lêkolînera muzîkê Zeynep Yaş jî li ser mijara “Jiyana Eyşe Şan û cihê wê di muzîka Kurdî de” axivî. Zeynep Yaş di serî de behsa dîroka muzîka Kurdî kir. Zeynep Yaş destnîşan kir ew bi salan e ku li ser muzîka Kurdî dixebitê û got: “Heta di salên 1950an de ji ber derfet tune bû muzîkjenên Kurd nekarîn dengê xwe qeyt bikin. Piştî di salên 1950an de hêdî hêdî deng hatin qeytkirin. Eyşe Şan jî yek ji wan bû ku dengê xwe qeyt kiribû. Lê ji bo zext hebûn nekarîbû bi navê xwe qeyt bikê. Ji bona wê di dîroka muzîka Kurdî gelek dereng dest pê kir. Berî Eyşe Şan tu dengê muzîkjenê Kurd nehatiye qeytkirin. Eyşe Şan yek ji pêşengê Muzîkjenê Kurdan bû. Lê em dizanin ku ji bo desthilatdar nehiştiye gelek kilam û stranên Kurdan nehatiye qeytkirin. Eyşe Şan di sala 1966an de kesa yekemîn bû ku stranên Kurdî stîrî. Îro bi sedan jinên Kurd stranên Eyşe Şan dibêjin.”
‘Stranên Eyşe Şan ji me re bûye nîşan’
Paşê derhêner Berfîn Zenderlîoglu li ser mijara “Jineke Muzîkjen û Hunermen: Eyşe Şan” axivî. Berfîn Zenderlîoglu diyar kir ku jiyana Eyşe Şan bala wê kişandiye û wiha axivî: “Dema em astengî dibînin Eyşe Şan tê hişê min. Gelek astengî û êş kişandiye lê herdem li ber xwe daye. Eyşe Şan ji xwe re negotiye feminîst lê tevahî jiyana Eyşe Şan li ser wê reye derbas bûye. Stranên Eyşe Şan ji me re bûye nîşan.”
Piştî panelê jî konserek hate lidarxistin. Di konserê de 15 hunermendên MA Music û Komeleya Çand û Hunerê ya Dîcleyê, KASED û Konservatuara Aram Tîgran derketin ser dikê, stranên Eyşe Şan gotin û bername bi dawî bû.
