Mihrîcana Çanda Kurd a ku li Brukselê bi dîmenên rengûreng destpê kir, ji konseran heya folkloran, ji xwarinên herêmî heya defîleyan bernameyeke berfireh pêşkêş dike.
Li Belçîkayê bi armanca nasandina çand û hunera Kurdî, her sal mihrîcana rengûreng tê lidarxistin. Îsal jî mihrîcanê li Brukselê destpê kir.
Di destpêka mihrîcanê de bi cil û bergên Kurdî li kolanan meşiyan. Meş bi def û zurnayan hate lidarxistin, jin bi defên xwe beşdar bûn. Kurd bi cil û bergên xwe yên herêmî beşdarî meşê bûn û di meşê de posterekî mezin ê Rêberê Gelê Kurd Abdullah Ocalan hildan. Meş li kolanên Brukselê nêzî nîv saetê dom kir û bala kesên biyanî kişand ser xwe.
Piştî ku kortej gihişt qada mihrîcnê deqeyek rêz hate girtin. Piştre hevserokên NAV-BELê axivîn. Di axaftinan de bal kişandin ser girîngiya nasandina çand û hunera Kurdî û bangeke xurt a tevlîbûnê hate kirin.
Li ser navê Saziya Çand û Hunerê ya Kurd a Ewropayê Sînan Gever jî axivî û destnîşan kir ku çalakiyên li ser çand-hunerê eleqeyeke zêde dibînin û ev yek ji bo gelê Kurd li çanda xwe vegere, firsendek girîng e. Sînan Gever bal kişand ser xeteriyên ku çanda Kurdî pê re rû bi rû ye û got, “Em dikarin bi xwedî derketina li çanda xwe, pêvajoya ku Rêber Apo dayî destpêkirin hîn pêşdetir bibin.”
Mihrîcana ku her sal tê lidarxistin, îsal wê heya 24ê Tebaxê bidome. Konser, folklor, defîleya cil û bergên Kurdî û xwarinên herêmî jî wê bên pêşkêşkirin.
Hunermendê Kurd Amele jî li qada mihrîcanê bû.
Mihrîcan dê li qada Place d’Espagne ya li navenda Brukselê, her roj piştî nîvro destpê bike û heya saet 20.00ê bidome.
