Şirnex– Li navçeya Cizîrê gelek kargehên wekî xwaringeh û kafe bi gefê belgeya ‘Em tazmînat naxwazin’ bi karkerên xwe didin îmzekirin.
Li Şirnexê bi hezaran welatî li kargehan bi heqdestê gelek hindik dixebitin û ji aliyê kargehan ve bêyî ku sîgorteya wan a tenduristiyê were çêkirin tên xebitandin. Her wiha ji ber vê rewşê bi hezaran welatî demsalên bihar û havînê berê xwe didin bajarên rojavayê Tirkiyeyê û di karên gelekî zehmet de dixebitin.
Li navçeya Cizîrê ya Şirnexê derket holê ku gelek kargeh ji bo sîgorteya karkeran a tenduristiyê têxin merîtiyê belgeyekî bi karkeran didin îmzekirin. Di vê belgeyê de tê gotin ku, “Ez bi vîna xwe ji kar îstîfa dikim, ji dema min dest bi kar kirî heya îro hemû heqê xwe yê tezmînatê, rojên betlane û saetên ez zêde xebitîme wergirtine. Ji aliyê fermî ve çi heqê min hebe hemû ji aliyê kargehê ve radestî min hatiye kirin. Ez taahut dikim ku serî li tu mafên xwe yên dozvekirinê nedim.”
Karkerê ku ev belge pê hatiye îmzekirin ji ber ku ji kar neyê derxistin nexwest navê kafeya ku lê dixebite em parve bikin.
Hêjayî gotinê ye ku ev kafeya ku vê belgeyê bi karkerên xwe dide îmzekirin li Tirkiye û Kurdistanê 300 şaxên wê hene. Her wiha li gelek dewletên cîhanê jî 75 şaxên wê hene.
