Amed – Bedirxan Çetînkayayê ku di sala 2016an de bi rêya KHKê ji kar hatibû derxistin diyar kir ku li dijî vê yekê vegeriya gundê xwe û li wir jiyanek û aboriyeke alternatîf ava kiriye.
Desthilata AKPê piştî darbeya 15ê Tîrmeha 2016an bi rêya KHKyan 125 hezar û 612 kedkar ji kar derxistin. Nêzî 10 sal in berxwedana kedkaran a li dijî KHKyan didome. Di vê pêvajoyê de gelek kedkaran jiyana xwe ji dest dan û gelekan jî ji bo debara xwe bikin karên cuda kirin. Yek ji van kedkaran jî Bedirxan Çetînkayayê di sala 2001an de wekî karmendê cemaweriyê li dadgehê dest bi kar kir û di sala 2016an de ji kar hat derxistin e. Bedirxan Çetînkaya di heman de 15 salan di karên sendîka û partiyên siyasî de cih girt. Piştî ku bi rêya KHKê ji kar hat derxistin, vegeriya gundê xwe yê bi navê Fidêla ya navçeya Sûra Amedê û dest bi karê çandiniyê kir. Piştî ew ji kar avêtin Serokê AKPê yê İspartayê Osman Zabûn ji wan re got ku “Bila koka darê bixwin.” Bedirxan Çetînkaya li dijî van gotinan vegeriya gundê xwe, ji xwe re jiyaneke nû avakir û xwest bibe bersiva pergalê û van gotinan. Bedirxan Çetînkaya têkildarî pêvajoya xwe ya kar derxistinê û karê ku niha dike ji ajansa me re axivî.
‘Ji bo ku me daxwaza jiyaneke hevpar kir em ji kar avêtin’
Bedirxan Çetînkaya diyar kir ku ew 15 salan wekî kedkarê cemaweriyê xebitiye lê her dem karên ked û sendîkayê jî meşandiye û wiha got: “Li Tirkiyeyê gelek tiştên xelet çêdibûn. Em jî li dijî wan tiştan bûn. Me digot bila tu kes jiyana xwe ji dest nede, dayîk negirîn. Piştî darbeya 2016an serê meha Cotmehê ez ketim girtîgehê û paşê di 29ê Cotmehê de ez ji kar derxistim. Kesên muxalîf, aştîxwaz ji kar hatin derxistin. Daxwaza me jî her dem jiyanek hevpar û rûmet bû, ji bo na wê me jî kar avêtin.”
‘Min jiyanek alternatîf avakir’
Bedirxan Çetînkaya piştî wan ji bi bîr xist ku piştî ew ji kar avêtin AKPiyan ji wan re gotiye “bila koka darê bixwin” û ev tişt gotin: “Li dijî vê gotinê ez jî vegeriyam ser axa xwe. Min li gund darên behîv û fistikan çandin. Ev 6 sal in ez li gund dijîm. Dema ez hatim gund tu tiştê min tune bû. Min li vir her tiştê xwe avakir. Bi salan e ez li gund dixebitim. Min di gund de jiyanek û aboriyek alternatîf avakir. Ji bo li dijî pergalê em bisekinin ez li vir im. Em koka darê naxwin, me li vir dar çandin. Kok li vir e kî bixwe bila werê bixwe. Em li vir jiyanek birûmet dijîn. Pergalê em ji kar avêtin û xwest em bişikên lê min li vir jiyanek alternatîf avakir. Em ê li ser mafê xwe jî bisekinin. Em ê vegerin ser karê xwe jî û em ê jiyana xwe berdewam jî bikin. Aştî dê pêk werê, her tişt pêk werê û baş be. Ez bang li tevahî kesên ji kar hatine dûrxistin dikim ku ew jî vegerin axa xwe. Dema ez hatim gund gotin ‘tu li vir nasekinî’ lê ez li vir im.”
