Di standa hişmendiya zimanî ku li navçeya Sûrê ya Amedê hate danîn de sticker û broşurên “Zimanê min welatê min e” , “Kurdî xweş e xwedî lê derkeve” hatin belavkirin.
Bi pêşengiya Saziyên Zimanê Kurdî û Platforma Saziyên Demokratîk ên Amedê de di çarçoveya 21ê Sibatê Roja Zimanê Dayîkê ya Cîhanê de li ber Mizgefta Mezin a navçeya Sûrê ya Amedê standa hişmendiya zimanî hate danîn. Di çarçoveya çalakiyê de, ji bo bilindkirina hişyariya civakî ya li ser zimanê dayikê; sticker, kokard û broşur hatin belavkirin. Her wiha li ser standê, materyalên dîtbarî û peyamên baldar ên bi Kurdî hatin pêşandan. Sticker û broşurên “Zimanê min welatê min e” , “Kurdî xweş e xwedî lê derkeve” , ”Zimanê min nasnameya min e” , “Kurdî 365 Roj” hatin belav kirin.
Tevî endamên saziyên zimanî, gelek nûnerên saziyên sivîl ên civakî jî piştgirî dan vê çalakiyê û bi awayekî çalak di nav de cih girtin. Çalakiya standê ku ji aliyê xelkê Amedê ve rastî eleqeyeke mezin hat, piştî xebatên sê rojan bi dawî bû.
