Şirnex – Şukru Guven ku li navçeya Elkê karê mêşvaniyê dike anî ziman ku ji ber nebûna bazara hingiv welatî bi karê mêşvaniyê nikarin debara xwe bikin û got: “Heke koperatîf bê avakirin bazara hingiv jî wê çêbibe û mêşvanî jî wê bibe çavkaniya debara welatiyan.”
Kurdistan ji ber ku ji aliyê xweza, çiya û flora xwe ve welatekî dewlemend e weke gelek hilberîn û karan yek jê jî karê herî zêde tê kirin karê mêşvaniyê ye. Ji ber dewlemendbûna floraya Kurdistanê hingivê li bajarên Kurdistanê jî bi qalîte ye. Li gelek bajarên Kurdistanê welatî bi karê mêşan ve mijûl dibin. Yek jî ji van bajaran jî Şirnex e. Li Şirnexê jî ji ber xwezaya wê ya dewlemend ji bo karê mêşvaniyê cihekî guncav e. Li navçeyên weke Elkê, Qileban, Silopiya, Hezex û çiyayên Cûdî û Gabar deverên herî zêde karê mêşvaniyê lê tên kirinê ne. Welatî li rex karê mêşvaniyê karên weke sewalkarî û cotkarî ve debara xwe dikin. Ji ber ku bazara hingiv tune ye welatî piranî hingivê xwe difiroşin şîrtek an jî welatiyên derdorê. Lê ew jî ji bo bazirganiya hingiv têrê nake.
Li Şirnexê yek ji navçeya herî zêde karê mêşvaniyê lê tê kirin navçeya Elkê ye. Navçeya Elkê xwedî xweza û florayeke dewlemend e. Pirraniya welatiyên navçeya Elkê jî bi sewalkarî û çandiniyê debara xwe dikin. Lê tevî ku karê mêşvaniyê li navçeyê pir zêde tê kirin jî welatî bi tenê karê mêşvaniyê nikarin debara xwe bikin. Nebûna bazara hingiv bandoreke mezin li ser welatiyên bi ji mêşvaniyê ve mijûl dibin jî dike. Mêşvan bi pirraniya hingiv ji bo mala xwe vediqetînin û yê mayî jî difiroşin. Şukru Guven ku li navçeya Elkê karê mêşvaniye dike qala zahmetî û pirsgirêkên mêşvaniyê kir.
‘Karê mêşvaniyê zêde bûye’
Şukru Guven anî ziman ku bav û kalên wan jî karê mêşvaniyê kirin e û ew bi xwe jî karê mêşvaniyê dike û wê çandê didomîne. Şukru Guven diyar kir ku di salên dawî de karê mêşvaniyê li navçeya Elkê zêde bûye û wiha got: “Ji ber ku bazara hingiv tune ye debar bi mêşvaniyê zahmet e. Xelkê me sewalkarî û çandiniyê dikin. Karê meşan jî weke hemû karî zahmetiyên wê hene. Bi giştî li Elkê welatî mêşan havînê dibin zozanan û zivistanê jî tên navçeyê û gundan. Min di nava zeviyê xwe ji mêşan re cih çêkiriye û zivistanê û havînê jî li vir xwedî dikin. Em şekir nadine mêşan. Hingivê wê xwezayî ye. Karê mêşan bêtir zivistanê heye. Ez biroj têm û heta êvarê eleqedqar dibim. Mum di kewarên me de tune ne. Mêş bixwe muman çêdikin.”
‘Divê kooperatîf bên avakirin’
Şukru Guven destnîşan kir ku nebûna bazara hingiv bandoreke mezin li ser wan dike û got ku ji bo hingiv divê kooperatîf bên avakirin. Şukru Guven bi lêv kir ku piştî kooperatîf ava bûn debara mirovan jî wê baştir bibe û axaftina xwe wiha qedand: “Li Elkê welatî ne ji ber debar û bazirganiyê ji bo mala xwe mêşan xwedî dikin. Hingivê meşên li vir jî xwezyî ye. Bazara hingiv ji ber ku tune ye welatî nikarin tenê bi mêşan debara xwe bikin. Elkê xwedî xwezayeke dewlemend e. Ji bo xwedîkirina mêşan derfetên me pirr zêde ne. Lê bazar tune ye. Heke koperatîf bên avakirin bazara hingiv jî wê çêbibe û mêşvanî jî wê bibe çavkaniya debara welatiyan. Heke koperatîf nebin karê mêşvaniyê ji ber lêçûn û zahmetiyên wê dê biqede. Ji ber wê jî kooperatîf bê avakirin û bi mêşvanên herêmê re pêwendî hebe dê bi vî awayî karê mêşvaniyê jî baştir bibe û bazara hingiv jî wê hebe.”
