Bi pêşengiya ciwanan Platforma Saziyên Demokratîk a Enqereyê li dijî êrişan çalakiya meşe li dar xist. Girseya astengiya polîsan nasnekir bi vêxistina meşaleyan û berzkirina dirûşmeyan bertek nişan dan.
Platforma Saziyên Demomratîk bi pêşengiya ciwanan li taxa Tuzluçayir a navçeya Mamakê ya Enqereyê li dijî êrişên komên çetê yên giredayî HTŞê û SMOyê li ser Şêxmeqsûd, Eşrefiyê û herêmên Bakur û Rojhilatê Sûriyeyê meş li dar xistin. Parlamenterên Partiya Wekhevî û Demokrasiyê ya Gelan (DEM Partî) Huseyîn Olan, Omer Faruk Hulagu endam û nûnerên saziyên giredayî platformê û gelek kes tevlî çalakiyê bûn.
Polîsan girseyê dorpeç kir û hewl dan çalakiyê asteng bikin. Girse di bin dorpeçê de pankarta li ser, “Berxwedana Rojava heza ciwanan e” vekirin û meşale pêxistin. Girseyê wêneyê fermandar Zeyad Heleb ku li Şêxmeqsûd jiyana xwe ji dest dabû rakirin û dirûşmeyên,”Bijî berxwedana Rojava”, “Rojava Rojhilat e Kurdistan yek welat e”, “Kurdistan wê ji faşîştan re bibe goristan” û “Jin jiyan azadî” berz kirin.
Girseyê demek dirêj di bin dorpêçe de meşale pêxistin û dirûşm berz kirin. Her wiha ciwanan bi gotina stranan bertek nîşanî êrişan dan û piştgiriya berxwedêran kirin. Girse astengiya polîsan nasnekir xwest dorpeçê hilweşîne. Demekê di navbera polîs û girseyê de gengeşî çêbû. Girsê bi dirûşmeyan bertek nîşanî astengiya polîsan dan. Li ser israra girseyê polis neçar man ku dorpeçê rakin. Piştre jî girse bi meş û berzkirina dirûşmeyan derbasî parqa taxê bûn û li wir daxuyanî da.
‘Rojava xeta sor a Kurdan e’
Parlamenterê Bedlîsê yê DEM Partiye Huseyîn Olan li wir axivî anî ziman ku HTŞê peymana 10ê Adarê û 1ê Nîsanê binpê dike û bi awayekî hovanê êriş dike. Huseyîn Olan bertek nîşanî hevkariya Tirkiyeyê ya bi çeteyên êrişkar da û wiha axivî: “Li Şêxmeqsûd û Eşrefiyê bi hezaran Kurd koçber kirin. Li nexweşxaneyê welatiyên sivil qetil kirin. Rojava rûmeta tevahî Kurdistanê ye. HTŞ êrişî bawerî û neteweyên cûda dike. Tirkiye jî piştgiriyê dide. Ew yek zirarê dide pêvajoyê. Ji aliyeki ve dibêjin xwişk-biratî ji aliyeki ve piştgiriyê bidin qetilkirina Kurdan nabe. Divê Tirkiye roleki erênî bilîze ne rolekî neyîni. Jixwe birêz Ocalan jî ew peyam da. Niha ji êrişî Tebqayê dikin. Lê Rojava dê li berxwe bide. Rojava xeta sor a Kurdan e. Em di Rojava de tawiz nadin. Em ê li her derê xwedî li mafên xwe derbikevin.”
