Li gelek welatên Ewropa û Amerîkayê ji bo piştgiriya berxwedana Rojava çalakiyên cêr be cêr hatin lidarxistin û peyama hevgrtinê ji gelê Rojava re şandin.
Çalakiyên ji bo Rojava li seranserê cîhanê didomin. Ji gelek welatên Ewropayê heta Meksîka, Endonezya û Amerîkayê çalakî hatin lidarxistin.
Li Bernê rê girtin
Li Bernê ciwanan xaçerêya Burgernzielê ya li Ostringê ji trafîkê re girtin û gotin: “Li vir li Burgernzielê, hûn tenê çend metreyan dûrî berpirsê erîşkaran û balyozxaneyên wan in. Balyozxaneya Tirkiyeyê bi tevahî ji aliyê polîsan ve hatiye dorpêçkirin; destûrê nadin xwepêşandanê. Balyozxaneya Îranê ji aliyê polîsan ve bi tundî tê parastin. Ji bo xwepêşandanê tenê aliyê din ê kolanê destûrê tê dayîn. Ev yek ji bo balyozxaneyên Rûsya û Îsraîlê jî derbasdar e. Em tundûtûjiya ku li vê taxê kok girtiye eşkere dikin!”
Li Aarauyê xwepêşandan
Li bajarê Aarau yê Swîsreyê li dijî êrîşên li ser Rojava xwepêşandanek hate lidarxistin. Xwepêşandan li ber avahiya hikûmetê pêk hat û li wir axaftin hatin kirin. Di axaftinê de wiha hat gotin: “Dema ku jiyana me ya rojane li vir berdewam dike, Rojava di bin êrîşê de ye. Mirov tên kuştin, hemû debara jiyanê tê wêrankirin. Nirxên ku Rojava temsîla wan dike jî di bin êrîşê de ne: demokrasî, xwerêxistinkirina femînîst, berxwedana kolektîf û enternasyonalîzm. Dema ku êrişî van nirxan tê kirin, ev me hemûyan eleqedar dike. Hevgirtin li sînoran bi dawî nabe. Bêdengî sûcdaran diparêze, berxwedan jiyanê diparêze. Ji ber vê yekê hewceye ku em ji niha û şûnde xwe birêxistin bikin. Li ser biaxivin. Hevgirtin tê wateya berxwedanê.”
Li ber partiya desthilatê ya Swêdê xwepêşandan hat lidarxistin
Li Goteborgê ciwanan li ber ofîsa Partiya Moderatan a Swêdê ku niha partiya desthilatdar e ya çalakiyekî li dar xistin. Di daxuyaniyê de wiha hat gotin: “Me serdana Moderatan li Goteborg kir û kîsikek pereyên xwînê li wir hiştin. Piştî ku koma El Qaîde- HTŞê desthilatdariya li Sûriyeyê girt destê xwe, hikûmeta Tido guncaw dît ku rejîma nû bi 295 milyon kronên Swêdî xelat bike. Biryara hikûmeta Swêdê tenê çend meh piştî komkujiya bi hezaran Elewî û Durzî ji aliyê rejîma Sûriyeyê ve hat dayîn. Pereyên bacgirên Swêdî niha dagirkirina deverên Kurdan ên li Bakur û Rojhilatê Sûriyeyê ji aliyê koma El Qaîdeyê ve û paqijkirina etnîkî ya gelên Sûriyê fînanse dikin. Ma ev karanîna maqûl a pereyên bacgirên Swêdî ye?”
Li Dresdenê li ber parlamentoyê rûniştin
Li Dresdenê çalakvan ketin civîna meclîsa bajêr. Çalakvanan ji galeriya giştî belavok belav kirin û bi dengekî bilind bang li endamên meclîsê kirin ku piştgiriyê bidin gelên ku li Rojava û Rêveberiya Xweser a Demokratîk a Bakur û Rojhilatê Sûriyeyê ku rastî êrişê tên. Berdevkê Înîsiyatîfa Aştiyê ya Kurdistanê derbarê çalakiyê de got: “Em bang li hemû endamên parlamentoyê û şaredaran dikin ku ji bo piştgiriya mirovî û siyasî ya ji bo rêveberiya xweser di hemû astan de parêzvaniyê bikin. Niha, mirov her roj dimirin, tên revandin, îşkencekirin û kuştin. Di bin van şert û mercan de, em ê venegerin jiyana rojane û vegera rewşa normal jî nabe.”
Xwendekarên Zanîngeha Erfurtê belavok belav kirin
Xwendekarên Zanîngeha Erfurt a Almanyayê ji bo Rojava belavok belav kirin û rewşa heyî ya li Rojava û bi taybetî li Kobanê, bi xwendekarên din re nîqaş kirin.
Li Welatê Baskê civîn
Li Welatê Baskê ciwan ji bo nîqaşkirina ramanên felsefî û siyasî yên Rêveberiya Xweser a Bakur û Rojhilatê Sûriyeyê û êrişên li ser Rojava civînek li dar xist. Di dawiya civînê de, çalakiyên ku bên rêxistinkirin hatin nîqaşkirin.
Li Barselonayê konser hat dayîn
Li Barselonayê konserek ji bo hevgirtinê ji bo Filistînê pêk hat. Di konserê de, li ser rewşa dawî ya li Rojava axaftinek hat kirin. Axaftvan gotin ku azadiya fîzîkî ya Rêberê Gelê Kurd Abdullah Ocalan ji bo pêvajoya aştiyê pir girîng e û divê Abdullah Ocalan tavilê ji girava Îmraliyê were berdan.
Li Galîsyayê çalakiya por hunandinê
Li Galîsyayê, jinên ciwan ji bo hevgirtina şervanên YPJê porê xwe hunandin.
Li Parîsê çalakiya rûniştinê
Ciwanan li îstasyona trênê ya Parîsê çalakiya rûniştinê li dar xistin. Di axaftina xwe de gotin: “Li ku derê zilm hebe, berxwedan jî heye! Em li vir ji bo em rêveberiya demokratîk a hemû gelan biparêzin. Em li vir in ku piştgiriyê bidin şoreşa jinên ku li dijî şîdeta cîhadîstan çek hilgirtine.”
Li São Pauloyê çalakiya hunerê
Li São Paulo ya Brezîlyayê çalakiyek hunerî ji bo Rojava pêk hat. Grafîkek bi navê Jin Jiyan Azadî ve ku hevgirtina xwe bi şoreşa Rojava re nîşan dide, bi destan hate çapkirin û hat belavkirin.
Li Chiapasê çalakiya afişan
Li Chiapas ê Meksîkayê ji bo piştgiriya bi Rojava re çalakiya afîşan pêk hat. Ciwanan gotin: “Ji Chiapasê! Li kolanên San Cristóbal li Chiapasê, me eşkere kir ku em li kêleka Rojava û şoreşa jinan in!”
Li Endonezyayê belav hatin belavkirin
Li Endonezyayê, materyalên agahdariyê li ser bingeha felsefî û siyasî ya Şoreşa Rojava hatin belavkirin.
Ji Amerîkayê silavên şoreşgerî şandin
Rangerên Azad ên Burmayê (Free Burma Rangers) a Amerîkayê silav, dua û stranan ji gelê Rojava re şand.
Li Wuppertalê ofîsa WDRê hat dagirkirin
Li Wuppertalê ciwan ji bo protestokirina bêdengiya ajansên nûçeyan ên Alman li hember êrîşên hovane yên HTŞ, DAIŞ û dewleta Tirk a li Rojava, ofîsa WDRê dagir kirin. Ji bo agahdarkirina raya giştî li ser rewşa dawî li Rojava belavok hatin belavkirin.
Li Hamburgê Der Spiegel hat dagirkirin
Li Hamburgê 30 kesan navenda kovara nûçeyan a Almanî Der Spiegel dagir kirin. Ciwanên careke din li dijî raporên yekalî ên kovarê nerazîbûn nîşan dan. Ciwanan gotin: “Der Spiegel rastiya êrîş û komkujiyên li Rojava nîşan nadin.”
Li Viyanayê weşana ORFê hat dagirkirin
Xwepêşandanek li ber aaziya weşanê ORF a Viyanaya Awûstûryayê pêk hat. Çalakvanên ku ORF dagir kirin gotin, “Hn wekî rojnamger tenê aliyê HTŞ û Tirkiyeyê radigihînin. Lazime di weşana ORF’ê de dengên ji Rêveberiya Xweser a Bakur û Rojhilatê Sûriyeyê jî cih bigirin!” Di çalakiyê de dirûşmeya “Jin Jiyan Azadî!” hat berzkirin.
Li Berlîn, Barselona û Varşovayê çalakiyên wêneyan
Li Berlîn, Barselona û Varşovayê çalakiyên wêneyan pêk hatin. Derbarê çalakiyan de ev tişt hatin gotin: “Li seranserê bajêr afîşên bi navên şervanên jin hatin daliqandin. Rêz û hurmet li şervanên jin ên ku di têkoşîna şoreşa jinan de şehîd bûne bigirin! Werin em êdî piştgiriyê nedin sûcdarên şer Colanî û Erdogan, werin em bêdengiyê bişkînin!”
Li Willingen û Schwenningenê çalakî
Ji bo hevgirtina bi Rojava re, li Villingen-Schwenningenê êrîşek li ser şîrketa Sudwestmetall hate kirin. Di daxuyaniyê de wiha hat gotin: “Şîrketa Sudwestmetall ji şer sûd werdigire û her wiha bi pîşesaziya çekan û artêşa Tirkiyeyê re karsaziyê dike. Şer li dijî şer! Bijî Rojava!”
Leipzigê çalakiya li dijî pîşesaziya çekan
Li Leipzigê jî ji bo piştgiriya berxwedana Rojava, êrîşeke li ser şaxekî şirketa Allianz hat kirin û ev peyam hat dayîn: “Em êrîşên milîsên îslamîst û artêşa Tirk, ku ji aliyê Rojava, bi taybetî YE û DYA ve têne piştgirîkirin bêbersiv nahêlin. Bi salan e Allianz piştgiriyê dide artêşa Tirk û şîrketa çekan a Îsraîlê Elbit. Şoreşa Rojava di van demên tarî yên şer de ronahiyek hêviyê ye. Ew her roj ji me re îspat dike ku civakek demokratîk, ekolojîk û azadixwaziya jin mimkun e. Em piştgiriyê didin YPJ û YPG. Niha dem dema berxwedanê ye!”
Li Malmo û Bochumê çalakî
Li Malmo ya Swêdê û Bochum a Almanyayê, ciwanan çalakiyên boyaxkirina bi spreyê li dar xistin û bal kişandin li ser êrîşên li dijî Rojava.
