Rêxistinên DBPê û DEM Partiyê yên navçeya Kanîreşê şahiya dengbêjan li dar xist. Di şahiyê de banga xwedîderketina li çanda dengbêjiyê hat kirin û dengbêjan bi kilamên xwe civat germ kir.
Rêxistina Partiya Herêmên Demokratîk (DBP) û rêxistina DEM Partiyê yên navçeya Kanîreşê ya Çewlîgê civata dengbêjiyê li dar xistin. Şahiya dengbêjiyê li cafeyek li navçeyê hate lidarxistin. Rêveberên DBPê û DEM Partiyê yên Kanîreşê û Çewligê û bi sedan welatî tev li şahiyê bûn. Cara yekemîne ku bi pêşengiya her du partiyan şahiyek wiha ya dengbêjiyê tê lidarxistin.
Dengbêjên hêrma Kanîreşê û ji Mala Dengbêjan a Amedê dengbêj Brahîmê Pîrîkê tev li şahiyê bûn.
Di şahiyê de dengbêjên jiyana xwe ji dest dane jî hatin bibîranîn. Bi taybetî jî dengbêj Sidîqê Bozo yê ji Kanîreşê ku di sala 1994an de jiyana xwe ji dest daye hate bibîranîn.
‘Em ê çanda Kurdî zindî bihêlin’
Şahiyê bi axaftina Hevserokê DBPa Kanîreşê Ozkan Bîngol dest pê kir. Ozkan Bîngol bal kişand ser armanca şahiya ew îro li dar dixin û got ku ji bo ew xelkê xwe bînin cem hev û xwedî li çand, huner, ziman û dîroka gelê Kurd derkevin vê şahiyê li dar dixin. Ozkan Bîngol destnîşan kir ku Kanîreş yek ji wan navçeyan ku kaniya dengbêjiyê ye û ew dixwazin çanda dengbêjiyê li navçeya xwe zindî bihêlin. Ozkan Bîngol anî ziman ku ew dixwazin her meh dê şahî û çalakiyek li dar bixin û havîna pêşiya me jî Festîvala Hilatina Rojê li dar bixin.
Piştî axaftina Ozkan Bîngol, derbasî guhdariya li dengbêjan bû. Dengbêjan jî di axaftinên xwe de gotin ku ew dixwazin her kes li çanda dengbêjiyê derkeve.
Dengbêjan civat bi kilamên xwe germ kir
Bi dorê dengbêj Brahîmê Pîrîkî, dengbêj Hecî Mihyedîn, dengbêj Emerê Baxçe, dengbêj Îmdat, dengbêj Osmanê Alpîra, dengbêj Eliyê Bîngolê, dengbêj Şemsedînê Erebo û stranbêj Halîl Bayindir bi dorê kilam û stranan gotin.
Dengbêjan hem kilamên şeran, hem stranên evînê û hem jî stranên folkolorîk gotin û civatê kêfxweş kirin. Şahî li ber kilaman bi dawî bû.
