Li Qada Newroza “Rêbertiya Azad, Civaka Demokratîk” a Amedê bi deh hezaran kes li ber def û zirnan û stranan govend digerînin û Newroza Azadiyê pîroz dikin.
Newroza îsal bi şiyara “Rêbertiya Azad, Civaka Demokratîk” ji hêla DEM Partî, DBP û TJAyê ve tê lidarxistin.
Saet di 10an de deriyên qadê hatin vekirin û hatina welatiyan a qadê dest pê kir. Ji hêlekî ve bi deh hezaran welatî tên qadê û ji hêlekî ve jî bi deh hezaran welatî li qadê li ber stran, def û ziranan govendê digerînin û Newroza Azadiyê pîroz dikin.
Bi deh hezaran welatî li bin siya wêneyê Rêberê Gelê Kurd Abdullah Ocalan û Şandeya Îmraliyê yê di 27ê Sibatê de li Girtîgeha Girava Îmraliyê hatiye kişandin Newroza xwe pîroz dikin.
Dilsoziya bi Abdullah Ocalan re
Her ku diçe qad tije dibe û îsal li bendê ye ku bi ser milyonek mirov re beşdarî Newrozê bibe. Bi deh hezaran bênavber dirûşmên “Bijî Serok Apo”, “Bê Serok jiyan nabe” û “PKK gel e, gel li vir e” berz dikin. Her wiha posterên Rêberê Gelê Kurd Abdullah Ocalan li qadê tên gerandin û xelk dilsoziya xwe ya bi Abdullah Ocalan re tînin ziman.
Beriya ku agirê Newrozê bê geşkirin, endam, rêveberên partiyên siyasî û rêxistinên civakî Kemal Korkut ku di Newroza 2017an de ji aliyê polîsan ve hatibû kuştin li cihê lê hatibû kuştin bibîr anîn.
