Li Amedê ji gelek deveran herikîna gel ber bi qada Newrozê ve dest pê kir. Ji navçeyan û bajarên derdorê jî gelek kes ji bo beşdariya Newrozê tên Amedê.
Li Amedê qada Newrozê li benda zêdeyî milyonek kesî ye. Li tevahiya bajar îro dikan nehatin vekirin û li gelek noqteyên bajar welatiyan dest bi kombûnê kir. Bi taybetî li navçeya Rezanê li gelek noqteyan welatî kom bûn û li ber dahûl û zirneyan dest bi govendê kirin. Welatiyên li vir li wesayîtan sûwar dibin, ber bi qada Newrozê ve derdikevin rê.
Kinc û bergên neteweyî li pêş in
Li noqteyên kombûnê bi hezaran welatî kombûne û di nav hewildana çûyîna qada Newrozê de ne. Di nav welatiyan de zêdebûna li xwe kirina kinc û bergên neteweyî balê dikişîne. Welatiyên li ber dahol û zirneyê govendê girê didin, sloganên, “Bijî Newroz” û “Bijî Serok Apo” diavêjin.
Li ber deriyên qadê girse kom dibe
Hêj ketina girseyê ya qadê dest pê nekir. Bes niha de bi hezaran kes li ber deriyan dest bi kombûnê kir. Hejmara girseyê her deqeya dibore zêde dibe. Bi taybetî li ber deriyên dikevin Yenî Mahalleyê kombûna girseyê balê dikişîne.
Welatiyan xwe bi kesk, sor û zeran xemiland
Li ber deriyê Zûmrût Kentê jî di seatên zû yên sibê de kombûna gel dest pê kir. Bi sedan kesên li vir jî gihiştine hev li berda ketina qadê ne. Welatiyên kincên neteweyî li xwe kirîn, xwe bi kincên kesk û sor û zer xelilandine.
Gel bi coş û peroş e
Ji noqteyên kombûnê heta ber deriyên qadê coş û peroja welatiyan balê dikişîne. Piştî vekirina deriyan ketina welatiyan a qadê jî dest pê kir.
