Li Şirnexê bi pêşengiya MEBYA-DERê bi wesileya Cejna Remazanê bi girseyî serdana goristanan hat kirin.
Bi pêşengiya Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER), rêxistinên Partiya Herêmên Demokratik (DBP), Partiya Wekhevî û Demokrasiyê ya Gelan (DEM (Partî) ên Şirnex û navçeyên wê û Meclisa Dayikên Aştiyê bi wesileya Cejna Remazanê bi girseyî serdana goristanan kirin. Girsê ewilî serdana Goristana Şehrî Nûh a Şirnexê kirin. Li vir kesên di qedexeyên derketina dervê ya navçeyên Silopiya, Cizîr û Şirnexê de canê xwe ji dest dabûn bi bîr anîn.
Di serdanê de ji bo kesên di têkoşîna azadî û demokrasiye de jiyana xwe ji dest dane deqîqeyek rêz hat girtin û dua hatin kirin. Piştî xwendina duayan parlamenterê DEM Partiyê yê Şirnexê Mehmet Zekî Îrmez axivî û bi lêv kir ku di qedexeyên derketina derve de bi hovîtiyeke mezin welatî hatin qetilkirin û wiha got: “Heta kesên ku ew hovitî kirine bên cezakirin, em ê têkoşîna xwe bidomînin. Em ê her tim şopdarên wan bin.”
Li Cizîrê serdana goristanan hat kirin
Piştre jî girseyê serdana Goristanên Banê Senefîs û Asrî yên li navçeya Cizîrê kirin. Li vir jî girseyê deqîqeyeke rêz girt û dua kirin. Her wiha girseyê sersaxiyê ji welatiyên hatibûn serdana goristanê re xwestin û cejna xelkê pîroz kirin. Balkêş bû ku li Goristana Asrî kêlikên goran hatibûn şikandin. Hat zanîn ku ne carek sê caran kêlikên goran hatine şikandin û xerakirin.
