Komîteya Xaça Sor a Navneteweyî (ICRC) ragihand ku li Sûdanê di dema şer de sala 2024an herî kêm 8 hezar kes winda bûn.
Serokê delegasyona ICRC a li Sûdanê Daniel O’Malley ji AFP’ê re axivî û anî ziman ku herî kêm 8 hezar kes winda ne û got: “Ev tenê ew hejmar e ku me piştrast kirine. Em zanin ku ev yek rêjeyeke biçûk a hejmara giştî ya bûyerên windabûnê ye.”
Berdevkê Sekreterê Giştî yê Neteweyên Yekbûyî (NY) Stephane Dujarric jî anî ziman ku hêzên paramîlîter rojek piştî ku eşkere kirin ku wan hikumeteke hevrik ava kirine fikar zêde bûn ku şerê li Sûdanê hîn giran bibe. Stephane Dujarric wiha got: “Em weke civaka navneteweyî, ji bo gelê Sûdanê ji vê felaketa metirsîdar rizgar bibe û ji bo dema derbasbûnê guhertinên maqûl bêne kirin, rê û rêbazan peyda bikin ku bibin alîkar.”
General Mohamed Hamdane Daglo roja Sêşemê eşkere kiribû ku wan hikumeteke hevrik ava kirine. Ji 15’ê Nîsana 2023’an û vir ve Hêzên Piştevaniya Lezgîn û artêşa General Abdul Fettah al Burhan ji bo welêt kontrol bikin şer dikin. Herdu alî jî têne sûcdarkirin ku di vî şerî de sûcên giran ên şer dikin.
