Tora Hevgirtina Mafên Zarokan a Wanê, têkildarî dorpêça li ser Kobanê û mafên zarokan daxuyaniyek belav kir û got: “Em bang li Neteweyên Yekbûyî, dewletên têkildar, mekanîzmayên mafên mirovan ên navneteweyî û hemû hêzên xwedî bandor ên li ser herêmê dikin ku mekanîzmayên zextê yên bi bandor çalak bikin”
Tora Hevgirtina Mafên Zarokan a Wanê derbarê êrişên li ser Rojava û dorpêça li ser Kobanê li ser hesabên xwe yên medyaya dîjîtal daxuyaniyek belav kir. Torê da zanîn ku geşedanên dawî yên li Rojava nîşan dide ku şerê li Sûriyeyê ketiye qonaxeke dijwar ku sivîl careke din dibin hedef. Torê bang li neteweyên yekbûyî, dewletên têkildar û saziyên mafên mirovan kir ku li dijî karesatê bêdeng nemînin.
Metna Tora Hevgirtina Mafên Zarokan a Wanê ku bi Kurdî, Tirkî û Ingilîzî hate weşandin, wiha ye:
“Geşedanên dawî yên li Rojava nîşan didin ku êrişên li Sûriyeyê ketiye qonaxek dijwar ku sivîl careke din dibin hedef. Êrişên li dijî komên etnîkî û olî yên cûda koçberîkirina bi darê zorê, îşkence û darvekirinên li ber çavên cîhanê têne kirin. Di heman demê de prensîbên bingehîn ên hiqûqa navneteweyî û qanûnên şer bi eşkere têne binpêkirin. Yek ji navendên herî qirofek û sembolîk ên vê pêvajoyê wekî berê, Kobanê ye.
Alîkariya mirovî hatiye astengkirin
Ji ber dorpêça ku bi rojan dom kiriye zarokan li bajarê Kobanê jiyana xwe ji dest dane. Li gorî daxuyaniyek ji Heyva Sor a Kurd herî kêm pênç zarok li bajêr ji ber kêmbûna kareba û sotemeniyê û astengkirina gihiştina pêdiviyên bingehîn cemidîne û jiyana xwe ji dest dane. Hemû dergehên ketin û derketinên Kobanê girtî ne. Li bajêr gihiştina kareba, sotemeniyê an xizmetên tendûristiyê tune ne. Alîkariya xizmetên mirovî bi kiryarî hatiye astengkirin. Ev şert û merc mafên jiyanê yê zarokan ji holê radike. Ji ber pêkanînên hêzên ku kontrola wan a fîîlî li herêmê heye, sivîl bi taybetî zarok ji pêdiviyên xwe yên bingehîn bêpar dimînin. Mirina zarokan ne tesadufî ye, ew encama rasterast a biryarên siyasî û leşkerî ye.
Peymana Mafên Zarokan a Neteweyên Yekbûyî mafê jiyanê, gihiştina xizmetên tendûristiyê û bicîhanîna pêdiviyên wan ên bingehîn ên zarokan garantî dike. Şert û mercên dorpêçkirin û pêvçûnan van erkan betal nakin. Berovajî vê parastina zarokan di bin van mercan de şertek girêdayî ay hiqûqa navneteweyî ye.
Bang li saziyên têkildar kirin
Wekî Tora Hevgirtina Mafên Zarokan a Wanê, di serî de em bang li Neteweyên Yekbûyî, dewletên têkildar, mekanîzmayên mafên mirovan ên navneteweyî û hemû hêzên xwedî bandor ên li ser herêmê dikin ku mekanîzmay3en zextê yên bi bandor çalak bikin da ku dorpêça li ser Kobanê were rakirin û alîkariya mirovî ya yekser û bênavber were radestkirin.
Li dijî dorpêçê bêndeng nemînin
Berdewamiya van mercan tê wateya berdewamiya mirina zarokan. Her sazî, her dewlet û her kemanîzmayek navneteweyî yên ku li hember tiştên ku li Kobanê diqewimin bêdeng dimîne, bi kiryar di berdewamiya van binpêkirinên giran ên mafên zarokan de hevpar e.
Çalakiyên bilez û şênber li dijî astengkirina alîkariya mirovî û paşguhkirina mafê jiyanê yê zarokan êdî ne tercîhek e, lê mecbûriyetek qanûnî û mirovî ye.”
