Bi boneya Roja Cîhanî ya Mafên Zarokan, li Kreş û Mala Nihêrtinê ya Zarokistana Perperike ya girêdayî Şaredariya Peyasê çalakiyeke watedar hate lidarxistin. Xwendekarên pirzimanî yên zarokistanê bi coş beşdarî vê çalakiyê bûn.
Ji sala 1954an vir ve her 20ê Mijdarê wek Roja Mafên Zarokan ya Cîhanê tê pîrozkirin. 20ê Mijdarê di heman demê de salvegera ragihandina mafên zarokan a ku di 1959an de hate weşandin û peymana mafên zarokan a ku di 1989an de li Civata Giştî ya Neteweyên Yekbûyî (NY) hate pejirandin e.
“Hefteya Mafên Zarokan” Li Amedê jî bi bernameyên cihêreng tê pîrozkirin. Şaredariya Peyasê jî bi dirûşma “Zarok Bi Mafên Xwe Zarok in” bi bernameyeke rengîn kêfa zarokan xweş kir. Ev bernameya ku dê hefteyekî bidome, fersendê dide zarokan ku mafên xwe fêr bibin, bi rêya lîstik, atolye, şano û çalakiyên afirîner bi awayekî azad û xwebawer xwe îfade bikin.
Gerînendetiya Kreş û Mala Nihêrtinê ya Zarokistana Perperîke ya Şaredariya Peyasê derbarê armanca xebatên xwe de wiha got:
“Em dixwazin ne tenê zanîna akademîk, di heman demê de hişmendiyeke kûr a li ser mafên zarokan di zarokên xwe de avabikin. Mafê herî bingehîn ê zarokan ew e ku mafên xwe bizanibin û bikaribin bi awayekî azad xwe îfade bikin. Em bi vê têgihiştinê tevdigerin: ‘Zarok, bi mafên xwe zarok in.’ Bi xebatên xwe, em zarokên xwebawer, hestiyar û hişyar mezin dikin da ku ew bibin xwediyê pêşerojeke azad.”
Lîstikên cihêreng û çalakiyên afirîner ên ji bo zarokan hatine amadekirin, eleqeyeke mezin dibîne. Ev bernameya bi naverokeke dewlemend, dê heta dawiya hefteyê bidome û hişmendiya zarokan a li ser mafan xurt bike.
