MED-DERê roja mamosteyan de daxuyanî da bal kişandin ser girîngiya zimanê Kurdî û diyar kirin ku ew perwerdeya bi zimanê dayikê dixwazin.
Komeleya Lêkolînên Ziman û Çanda Mezopotamyayê (MED-DER) bi munasebeta roja mamosteyên cîhanê şahiyek li dar xist. Şahî li parqa Ekîn Ceren a navçeya Peyasê ya Amedê hat lidarxistin û nûnerên saziyên civaka sivîl û yên ziman beşdarî daxuyanî û çalakiyê bûn.
Rêveberê MED-DERê Îbrahîm Halîl Taş ewilî axivî, diyar kir ku roja mamosteyan ji bo gelê Kurd gelekî girîng e. Îbrahîm Halîl Taş anî ziman ku perwerdekarên Kurd bihişmend in û xwe dispêrin civakek demokratîk, exlaqî û got: “Ew çand û ziman diparêzin. Ziman hebe dê Kurd jî hebin. Yê me digihîne hev ziman e. Zimanê me di siyaset û rêxistinbûnê de rolek girîng dilîze. Gotina ‘ez nikarim xwe îfade bikim’ xwe xapandin, nivîsandin, xwexapandin û biyanetîbûna ji xwe re ye.’ Di zimanê zikmakî de hişmendiya neteweyî pir girîng e.
Yên xwedî hişmendiya neteweyî xwe ji kurdayetiya xwe dûr naxin. Ji çand û hunerê hez dikin. Bi ziman û çanda xwe re di nava aştiyê de ne. Dikarin kurdayetî, huner û çanda xwe biparêzin. Dikarin bi zimanê xwe biaxivin û biparêzin. Dikarin zarokên xwe fêrî zimanê dayikê bikin.”
Hevserokê Egîtîm Senê yê Hejmar 2 yê Amedê Serhat Kiliç jî wiha got: “Perwerde heta ku mirovatî hebe dê bi vî awayî çanda heyî jî derbasî nifşên paşerojê bikin. Pîşeyek pîroz e, lê di civaka ku em tê de dijîn em dibînin ku mamostetî tenê dayika zarokan û civakê ye. Ji ber vê yekê weke Egîtîm Senê weke mamosteyên vê civakê em dixwazin bi zimanê dayikê perwerdehiyê bidin. Ji ber ku pîşeyê me watedar bibe.”
Endamê Komisyona Perwerdehiyê ya ANKAyê Yildirim Arslan bi pîrozkirina roja mamosteyan dest bi axaftina xwe kir. Arslan diyar kir ku perwerde sembola azadiyê ye û destnîşan kir ku pîşeyê mamostetiyê gelekî bi qîmet e.
Mamosteyê Zimanê Kurdî Musa Şanak jî li ser girîngiya zimanê Kurdî axivî û got: “Divê mirov ji xwe, ji mal û ji kolana xwe dest pê bike zimanê xwe yê Kurdî bike.”
Pîrozbahî bi govendê û bi beytên Kurdî bi dawî bû.
