Colemêrg – Li dijî êrişên ser Rojava yên çeteyên HTŞ, SMO û Tirkiyeyê li navenda Colemêrgê meş hat lidarxistin wiha hat gotin: “Komkujiyên bi destê JÎTEMê dihatin kirin îro bi destê HTŞê tên domandin.”
Platforma Saziyên Demokratîk a Colemêrgê bi şîara “Em ji bo Rojava dimeşin” li bajêr meşeke girseyî li dar xist. Di meşê de pankarta “Rojava wîjdan, berxwedan û azadî ye, teslîm nayê girtin” hat vekirin û dirûşmên “Bijî Serok Apo”, “Bijî berxwedana Rojava” û “Şehîd namirin” hatin berzkirin. Parlementerên DEM Partiyê yên Colemêrgê, Dayikên Aştiyê, endam û rêveberên partiyên siyasî, nûnerên saziyên sivîl û gelek welatî tev li meşê bûn.
‘Rojava vediguhere qada şer’
Piştî meşê daxuyanî hat xwendin û hevserokê DEM Partiyê yê Colemêrgê Behçet Kanat, metna daxuyaniyê xwend. Behçet Kanat diyar kir ku êrişên bênavber ên li dijî Rojava sûcekî eşkere yê mirovahiyê ye û ev tişt anî ziman: “Ev êrişên bi çekên giran ên ji hêla komên çekdar ên girêdayî Hikûmeta Demkî ya Şamê ve têne kirin, rasterast sivîlan hedef digirin û dibin sedema windahiyên sivîl. Di nava wan de zarok jî hene. Armancgirtina sîstematîk a deverên niştecihbûnê binpêkirinek bi zanebûn a mafê jiyanê ye û delîlek eşkere ye ku Rojava vediguhere qada şer.”
Konsepta komployê li Rojava didome
Piştî re parlamentera DEM Partiyê ya Colemêrgê Oznur Bartinê êrişên li ser Rojava şermezar kir. Oznur Bartinê da zanîn ku dilê hemû Kurdan ji bo Rojava lê dide û wiha axivî: “Li Rojava berxwedanek mezin bi pêşengiya jinan pêk hat û hemû gel bi hev re dijîn. Konseptek komployê li dijî Birêz Ocalan pêş ket û îro jî heman konsept li Rojava pêş dikeve. Pêvajoya Aştî û Civaka Demokratîk wekî jiyanek alternatîf, fersendeke dîrokî ji hemû gelan re hat dayîn. Ev yek li gorî dewletên neteweyî nebû. Hûn xiyaneta herî mezin dikin.”
‘Tişta ku JÎTEMê dikir, niha HTŞ dike’
Piştre, parlamenter Vezîr Parlak Coşkûn jî axivî û ev tişt got: “Em hemû şehîdên berxwedana Rojava bi bîr tînin. Wek gelê Colemêrgê, em vê berxwedanê hembêz dikin. Silav ji Kurdên ku li hemû parzemînan li ber xwe didin re. Bi hezaran sal in em li ser erdnîgariya xwe bi çand û zimanê xwe jiyan. Me qet dest nedaye milkê tu kesî. Lê wan bi polîtîkayên cûrbecûr, dest datînin ser nirxên me. Bila mafên gelê Kurd di qanûn û destûrê de werin naskirin. Bi hezaran sal in gelê Kurd ji têkoşîna xwe paş ve gav neavêtiyê. Kurd bi mirinê têk naçin, serî natewînin. Em ê vê têkoşînê berfireh bikin. Komkujiyên ku ji hêla JÎTEMê ve hatine kirin, niha ji hêla HTŞê ve têne kirin. Em vê yekê qebûl nakin.”
Daxuyanî bi çepikan bi dawî bû.
