Amed – Parêzer Nahît Eren ku ji bo serokatiya Amedsporê hate hilbijartin got: “Amedspor ji bo gelê Kurd tîmek girîng e. Amedspor gula Kurdistanê ye.”
Amedsporê kongreya xwe ya awarte li dar xist. Ev kongreya 9emîn a Amedsporê ye tê birêvebirin û Serokê Baroya Amedê parêzer Nahît Eren wek Serokê Qluba Amedsporê yê 8emîn di kongreyê de hate hilbijartin.
Nahît Eren têkildarî Amedsporê ji Ajansa Welat re axivî û destnîşan kir ku Amedspor gula Kurdistanê ye û xwest hemû Kurd xwedî lê derkevin.
‘Amedspor ji bo gelê Kurd girîng e’
Nahît Eren anî ziman ku îro carek din xwe nîşan da ku tevahiya gelê Kurd Amedsporê tenê wek tîmek sporê nabîne û got: “Îro dîsa derket holê ku Amedspor nasnameya Kurdan e. Ji bo gelê Kurd cihê Amedsporê pirr girîng e. Heta îro li dijî zilmê û neheqiyê sekiniye. Ji îro şûn ve jî wê li ber zilmê û neheqiyê rabe. Em ê wek rêveberiya nû bi heman nasnameyê karên xwe bidomînin. Ev kongreya me ya awarte li gelê Kurd pîroz be.”
‘Em ê nehêlin neheqî li Amedsporê bibin’
Nahît Eren diyar kir ku ew ê nehêlin neheqî li Amedsporê bibe û wiha got: “Em carek din dibêjin heke neheqiyek li dijî ziman, nasname, çanda me bibe em ê li ber vê rabin. Amedspor wê li dijî bêhiqûqiya bêdeng nemîne.”
‘Em ê îsal bibin şampiyon’
Nahît Eren banga piştevanî û alîkariya ji bo Amedsporê kir û got: “Bila hemû alîgirên Amedsporê û gelê Kurd piştgiriyê bide Amedsporê. Çimkî Amedspor gula Kurdistanê ye. Înşelah em ê îsal bibin şampiyon.”
