Mêrsîn – Piştî binçavkirina Hevşaredarên Akdenîzê, gel li pêşiya avahiya şaredariyê ya hatiye dorpêçkirin kom bû. Welatiyên bertek nîşanî binçavkirina hevşaredaran da û li dijî hewldana danîna qeyûm destnîşan kirin ku ew ê xwedî li vîna xwe derkevin.
Hevşaredarên DEM Partiyê yên Akdenîz a Mêrsînê Hoşyar Sariyildiz û Nûriye Arslan û 4 endamên Meclisa Şaredariyê îro di danê sibehê de di encama serdegirtinên malan de hatin binçavkirin. Ji bo dosyaya hevşaredaran biryara nepeniyê hate dayin û hevdîtina bi parêzeran re ji bo 24 saetan hate qedexekirin. Gelê navçeya Akdenîzê jî li dijî hewldana danîna qeyûm, li pêşiya şaredariyê ku hatiye dorpêçkirin kom bû û bertek nîşanî vê hewldanê dide. Welatiyên ku bertek nîşanî hewldana qeyûm dan diyar kirin ku heta hevşaredarên wan bên berdan dê li ber şaredariyê bin.
‘Hem aştî hem bindestî naçe serî’
Welatiyê bi navê Halît Bozkûrt bertek nîşanî binçavkirina Hevşaredarên Akdenîzê û hewldana qeyûm da û wiha got: “Destûra bingehîn ji bo hemû welatiyan eynî ye. Ji ber wê mafê kesê nîne dest deyne ser şaredariyê. Nikarin bi zordestiyê dest deynin ser mafê min. Çend roj beriya niha behsa aştiyê dikirin. Ev aştî ji bo çi ye. Hem aştî hem bindestî naçe serî. Kurd ne serdestiyê azadiyê dixwazin.”
‘Ji aliyekî destê aştiyê dirêj dikin li aliyê din qeyûm datînin’
Stranbêj Ramazan Eren jî got ku “Ji aliyekî destê aştiyê dirêj dikin li aliyê din qeyûm datînin ser şaredariyê” û ev tişt gotin: “Heke di aştiyê de rast bin bila qeyûm tayînî şaredariyên me nekin. Em qeyûm şermezar dikin. Heta ew hevşaredarên me û endamên me yên meclisa şaredariyê bernedin em ê li vir çalakiyên xwe berdewam bikin.”
‘Em xwedî li şaredariya xwe derdikevin’
Welatiyê bi navê Kadrî Memîş jî diyar kir ku ji bo xwedî li vîna xwe derkevin li pêş şaredariyê ne û wiha got: “Em vê yekê qebûl nakin. Neyar dibêje ez tiştekî nadim we. Dijmin bi salan e kurd qebûl nekiriye. Em jî dibêjin em hene, em li vir in em xwedî li şaredariya xwe derdikevin. Em xwedî li xwe, li kurdîtiyê, li Kurdistanê derdikevin. Em vê yekê şermezar bikin bila dest ji van hewldanên xwe berdin.”
‘Em ê têkoşîna xwe berdewam bikin’
Zeynep Aslan jî wiha axivî: “Ez şermezar dikim. Ji xwe her tişt ji kurdan re qedexe ye. Dibêjin mafê wan tune ye. Wexta ji kurdan re her tişt qedexe ye bila nexin hilbijartinê. Bêjin hûn tune ne em jî nekevin hilbijartinê. Em dikevin hilbijartinê ked didin, çar-pênc meh şunde qeyûm tayin dikin. Em vê neheqiyê qebûl nakin heta ku ji destê me were em ê li vê derê têkoşîna xwe berdewam bikin. Kurd her hene dê her hebin û her li ber xwe bidin.”
Ciwanê bi navê Xemgîn Azad jî diyar kir ku şaredarî îradeya wan e dê ji bo îradeya xwe li ber xwe bidin û got: “Şaredarî îradeya me ye, em vê zilmê qebûl nakin.”
‘Em polîtîkayên qeyûman qebûl nakin’
Rêvebera Komeleya Mafên Mirovan (ÎHD) a Şaxa Mêrsînê Şukran Aktaş jî destnîşan kir ku qeyûm binpêkirina mafê mirovan e û wiha got: “Ev yek li dijî qanûnên Tirkiyeyê bi xwe ye jî. Mafê gel bi xwe bi dest xistî bi qeyûman dîsa ji destê wan tê standin. Ev yek li dijî hiqûqê ye li dijî demokrasiyê ye. Em van kirinan, qeyûman û polîtîkayên qeyûman qebûl nakin. Li dijî mafê mirovan e.”
