Nûner û rêveberên partiyên siyasî û rêxistinên civakî li 8 bajaran komkujiya Roboskiyê şermezar kirin û xwestin hesab bê pirsîn.
Balafirên şer ên Tirkiyeyê di 28ê Kanûna 2011an de li Roboskiyê bombe barandin û di êrîşa hewayî de 19 jê zarok 34 welatî kuştin. Di ser komkujiyê re 14 sal borîn, lê hîn hesab nehatiye birsîn. Ji bo hesab bê pirsîn, nûner û rêveberên partiyên siyasî û rêxistinên civakî li Mêrsîn, Edene, Hatay, Ceyhan, Riha, Mêrdîn, Amed û Êlih çalakiyên girseyî li dar xistin.
Mêrdîn
Platforma Ked û Demokrasiyê ya Mêrdinê, li Parka Karayollariyê daxuyanî da. Gelek kes tev li daxuyaniyê bûn. Girseyê, dirûşmên “Bimre komkujî, bijî azadî” û “Roboskê ji bîr neke û nede jibîrkirin” berz kir. Ji bo kesên di komkujiyê de hatine qetilkirin deqeyek rêz hate girtin. Piştre jî Berdevkê Platformê Mervan Erdem axivî û got: “Aştî ne tenê bi bêdengkirina çekan, bi derxistina holê ya heqîqetê û bi cîbicîkirina edaletê pêkan e. Şertê sereke yê aştiyeke mayinde û civakî, sernegirtina binpêkirinên mafên mirovan ên di demên berê de hatine kirin, derxistina wan a holê û darizandina berpirsyarên wan e.”
Di berdewamê de Erdem anî ziman ku di sûcên li dijî mirovahiyê de demborîn nabe û got: “Heta ku berpirsyarên Komkujiya Roboskê derdixin holê, komkujî ji her alî ve tê ronîkirin û berpirsyar tên darizandin dê têkoşîna me bidome. Kesên biryara vê komkujiyê dane, kujer û yên kujeran diparêzin dê bên aşkerakirin. Polîtîkaya necezakirinê dê rê li ber sûcên nû veke. Darizandina faîlan, tekane rêya pêşîlêgirtina sûcên nû ye.”
Riha
Hêzên Ked û Demokrasiyê yên Rihayê jî li pêşiya Novada Park AVM ya li navçeya Halîliyeyê daxuyanî dan. Di daxuyaniyê de pankarta “Roboskê ne dram e komkujî ye, me ji bîr nekir dê nedin jibîrkirin” hate hilgirtin. Gelek kes tev li daxuyaniyê bûn. Hevserokê Şaxa OHD’a Rihayê Yasîn Aktaş di daxuyaniyê de axivî û got ku tevî bi ser komkujiyê re 14 sal derbas bûne jî hêj faîl nehatine girtin û cezakirin.
Aktaş, bi bîr xist ku komîsyona lêkolînê ya di bin sîwana Meclisê de hatiye avakirin komkujî baş lêpirsîn nekir, meqamên darazê bêalî û serbixwe tenvegeriyan, AYM’ê bi hinceta “ewraqên kêm” dosya qebûl nekir û DMME’yê jî bi îdiaya “hemû rêyên hiqûqa navxweyî nehatin bikaranîn” dosya red kiriye. Aktaş, ev yek weke “xwegihandina edaletê bi awayekî fiîlî ji holê hate rakirin” nirxand. Aktaş, got: “Divê dewlet berpirsyartiya xwe ya di Komkujiya Roboskê de qebûl bike û edaletê bicih bîne. Ev, berpirsyartiyeke dîrokî, hiqûqî û wijdanî ye.”
Wekîla DEM Partiyê Dîlan Kunt Ayanê jî anî ziman ku komkujiya hatiye kirin ne operasyon, tercîheke bi zanebûn bû û xwest komkujî were ronîkirin.
Edene
Şaxa ÎHD’a Edeneyê, partiyên siyasî û rêxistinên civaka sivîl jî li Parka Înonuyê daxuyanî dan. Di daxuyaniyê de pankartên “Sûcê nehatî darizandin birîneke nekewandî ye”, “Ji bo Roboskê edalet” û “Ji bo Roboskê edalet, ji bo her kesî edalet, me Roboskê ji bîr nekin û dê nedin jibîrkirin” hatin hilgirtin. Bîranîn, bi deqeyek rêzgirtinê dest pê kir. Piştre jî helbest hatin xwendin û li muzîkê hate guhdarîkirin. Hevseroka Şaxa ÎHD’a Edeneyê Yasemîn Dora Şeker di daxuyaniyê de got ku divê pêvajoya hiqûqî ya têkildarî Komkujiya Roboskê jinûve dest pê bike û bi awayekî bêalî û serbixwe bê meşandin. Yasemîn Dora Şekerê xwest ku faîl bên tespîtkirin û darizandin û got: “Divê dewlet lêborîneke fermî bixwaze û hemû windahiyên madî û manewî yên malbatên kesên hatine kuştin tazmîn bike.”
Ceyhan
Rêxistina DEM Partiyê ya Ceyhanê jî li avahiya xwe bîranîn li dar xist. Hevserokê Bajêr Tahir Ozdemîr di bîranînê de got ku avakirina komareke demokratîk, bi hevrûbûna komkujiya Roboskê pêkan e û xwest berpirsyar bên darizandin.
Mêrsîn
Platforma Ked û Demokrasiyê ya Mêrsînê jî li Parka Ozgur Çocuk daxuyanî da. Di daxuyaniyê de pankarta “Ne înkar; hevrûbûn, ne şer, aştî” hate hilgirtin. Her wiha beşdaran dirûşmên “Şehîd namirin” û “Roboskê ji bîr neke û nede jibîrkirin” berz kirin. Rêvebera Şaxa ÎHD’a Mêrsînê Şukran Aktaşê di daxuyaniyê de got ku hêj komkujî nehatiye ronîkirin, faîl nehatine cezakirin û derxistina heqîqetê bi awayekî sîstematîk tê astengkirin. Şukran Aktaşê xwest dewlet bi komkujiyê re hevrû bibe û bi awayekî fermî lêborînê bixwaze.
Hatay
Şaxa ÎHD’a Hatayê jî li pêşiya komeleyê daxuyanî da. Hevserokê Şaxê Mursel Tonguç Salmanoglû kesên di komkujiyê de jiyana xwe ji dest dane bi bîr anî û xwest berpirsyar bên darizandin.
Êlih
Platforma Saziyên Demokratîk a Êlihê jî li Parka Yilmaz Guney daxuyanî da. Gelek kes tev li daxuyaniyê bûn. Di daxuyaniyê de pankarta “28’ê Kanûnê Komkujiya Roboskê; me ji bîr nekir û dê nedin jibîrkirin” hate hilgirtin. Endama MEBYA-DER’ê Guneş Çetînkaya Erdem daxuyanî xwend. Wekîla DEM Partiyê Saliha Aydenîzê di daxuyaniyê de got ku dosyaya doza Roboskê hatiye paşguhkirin û got ku ji bo pêvajoya heyî bi ser keve divê dewlet berpirsyarê komkujiyê bidarizîne. Daxuyanî, bi dirûşma “Şehîd namirin” bi dawî bû.
Li Amedê jî nûnerên saziyên civakî û partiyên siyasî bi heman Armancê li pêş AZC Plaza ya Ofîsê daxuyanî da û komkujî şermezar kir.
