Hevşaredara Bajarê Mezin a Wanê Neslîhan Şedal di çalakiya li dijî qeyûm de got: “Em kurd in û ser bilind in. Ev ax axa me ye û zimanê me kurdî ye û em ê li dijî dagirker û qeyûman zimanê xwe, nasnameya xwe, çanda xwe û bajarê xwe biparêzin.”
Bi pêşengiya Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) li dijî tayînkirina qeyûm a li ser Şaredariya Bajarê Mezin a Wanê li Parqa Feqiyê Teyran daxuyanî dan. Di daxuyaniyê de dirûşmên “qeyûm ê diz, ji Kurdistanê here”, “qeyûm wê biçin, gel wê bê” û “gelê Wanê li vir e, li cem vîna xwe ye” berz kirin. Meclîsa Dayikên Aştiyê û nûnerên Konfederasyona Sendîqeya Kedkarên Cemaweriyê (KESK) jî piştgirî dan çalakiyê. Ewilî Endama Meclîsa Dayikên Aştiyê ya Wanê Zekiye Kaya axivî û diyar kir ku ew ji bo aştiyê her tim amade ne.
Li ser navê TJAyê Rojbîn Bor jî berxwedana gelê Wanê silav kir û got: “Dîrokeke xwînrêj li vir tê nivîsandin û em şahidiya wê dîrokê dikin. Divê kesên ku van êrîşan pêk tînin bizanin ku me serê xwe netewandiya û cong nedanaye. Bi tayînkirina qeyûman we çi qezenc kir? Ev gel çi dibêje? Bekir Kaya rûmeta me ye, Abdullah Zeydan rûmeta me ye, Neslihan Şedal rûmeta me ye. Ji bo qeyûm çi dibêjin? Qeyûm diz û talankar e. Dîrok wê qeyûman weke diz û talanker binivîse û wê polîsên ku li kolanan îşkence kirine jî binivîsîne.”
‘Gelên Tirkiyeyê bê çare nînin’
Hevşaredarê Bajarê Mezin ê Wanê Abdullah Zeydan jî axivî û diyar kir ku gelê Wanê tevî îşkenceyê jî li kolanan li ber xwe didin. Abdullah Zeydan anî ziman ku kesên ku rê li ber tayînkirina qeyûm vekirî û piştgirî dayî, li kolanan bi îşkenceyê gelê Wanê binçavdikin û got: “Ev kes di heman demê de êrîşî dayikên me, hilbijêrên me, parlementerên me jî dikin. Provakator û paramîlîterên ku bi hêviyên gel dilîzin, hêviya aştiyê ya herî biçûk jî dikujin. Bi sebra gelê Kurd nelîzin û dawî li êrîşên li ser vîna vî gel bînin. Walî dîsa vîna gel desteser dike û fermana îşkenceyê dide. Wê gel bersiva we dîsa bide we. Wê Tirkiye rojekê teqez bigihije demokrasiyê. Gelên Tirkiyeyê bêçare nînin. Gelê ku di sala 2002yan de AKP kirine desthilat, wê tekoşîna xwe ya li hemberî bêedaletî û nelirêtiyan bide. Ew kesên ku ji wê rojê ve suc dikin, wê li ber daraza xweser hesap jî bidin. Em spasiya gelê dikin ku piştgiriyek wiha
mezin û coş dan me.”
‘Em kurd in û serbilind in’
Hevşaredar Neslîhan Şedal jî çend gotin kirin û diyar kir ku kesên şaredarî dagir kirin, divê ji laçikên dayikan şerm bikin. Neslîhan Şedal, destnîşan kir ku dagirker bê şerm in û wiha got: “Îro vîna gelê Kurd desteser kirin, lê di esasê xwe de dixwazin Kurdan tune bikin. Em Kurd in û ser bilind in, ev ax axa me ye û zimanê me Kurdî ye. Em ê li dijî dagirker û qeyûman zimanê xwe, nasnameya xwe, çanda xwe û bajarê xwe biparêzin.”
