Amed – Serokê Komeleya Şêx Seîd Kasim Firat bal kişand ser yekîtiya gelê Kurd û destnîşan kir ku bêyî yekîtiyê tiştek nabe û got: “Yekîtî pêwîst e, heta ku Kurd nebin yek, dinya wan nas nake.”
Êriş û komkujiyên li dijî Rojavayê Kurdistanê pêk hatin hemû Kurdên li Kurdistan û li welatên cîhanê anîn cem hev û bi milyonan kesên ku li dijî êrişan derketin kolanan li ser yekîtiya Kurdan peyamên girîng ragihandin. Piştî vê berxwedana gelê Kurd, Hikûmeta Demkî ya Şamê neçar ma ku bi Rêveberiya Xweser a Rojava re di 29ê Çile de peymenekê îmze bike. Li gel êrişên li ser Rojava careke din yekîtiya neteweyî ya gelê Kurd kete rojevê. Geşedanên li Rojhilata Navîn nîşan dan ku divê li dijî êrişan û hemû xetereyên heyî, gelê Kurd yekîtiya xwe ya neteweyî ava bike.
‘Felaketa li Helebê û Rojava bû wesîle ku Kurd bên cem ba hev’
Serokê Komeleya Hevkarî, Çand û Perwerdehiyê ya Şêx Seîd Kasim Firat têkildarî yekîtiya gelê Kurd ji Ajansa Welat re axivî.
Kasim Firat anî ziman ku gelek bextiyar e ku li çar aliyê Kurdistanê di nava gelê Kurd de yekîtiyek ava bûye û wiha got: “Felaketa Şêx Meqsûd, Heleb û Rojava bû wesîle ku Kurd bên bahev û bibin yek. Heta niha li hin cihan di nava Kurdan de bêtifaqiyek hebû ew jî sunî bû ji aliyê xebatkarên siyasî ve dihate kirin. Ew jî ji bo berjewendiyên xwe dikirin. Ev jî hêdî hêdî ji holê radibin. Yekîtî pêwîst e, heta ku Kurd nebin yek, dinya wan nas nake. Divê em bibin yek. Ne ku bibin yek partî yek îdeolojî li ser berjewendiyên xwe yên esasî em bikaribin tifaqî û yek zimanî çêbikin. Wê demê feydeya wê çêdibe.”
‘Şêx Seîd Efendî û bavê min ji bo yekîtiyê xebatên girîng kirin’
Kasim Firat diyar kir ku bapîrê wî Şêx Seîd Efendî û bavê wî Şêx Elî Riza ji sala 1925an heta 1929an li Rojava, Rojhilat, Başûr jî ji bo ku Kurd bên bahev gelek xebatên girîng kirin û wiha domand: “Ji bo yekîtiya Kurd gelek xebat kirin. Çûn ba Şêx Mehmûd Berzencî, Şêx Ehmed Barzanî, Simkoyê Şikakî, Evdilrezaq Bedirxanî. Ji hemûyan re gotin werin bahev bibin yek û dijminê xwe bikin yek. Eniya xwe bikin yek. Hûn ê serbikevin cîhan vê ji me dixwaze. Wê çaxê bi ser neket lê vê berxwedana sedsalî gelek tişt bi me da zanîn. Bêyî yekîtiyê tiştek nabe. Kurd û Kurdistan ji her tiştî mezintir e bila vê herkes bizane. Êdî bes e. Gelê Kurd bi sedan sal e têdikoşe, sed hezaran şehîd dane. Em malê kesê dagirnakin dixwazin weke mirovan li cîhanê bijîn. Em ji hiqûqa herkesê re rêzê digirin lê em dibêjin em jî bi hiqûqa xwe ya xwezayî bijîn. Bila Kurd şirîkên xwe tespît bikin, li ser van yekîtiya xwe saz bikin. Hemû şehîdên Kurdan şehîdên me ne, bila ji wan re rêzê bigirin û bila navxweyî de jî edaletê sax bikin.”
‘Divê gelê Kurd xwe bispêrin hêzên xwe yên esasî’
Kasim Firat bal kişand ser pêvajoya heyî û wiha pê de çû: “Divê di vê pêvajoyê de gelê Kurd xwe ji însafa desthilatê û emperyalên cîhanê re nehêlin. Bila xwe bispêrin hêzên xwe yên esasî. Ew jî Kurd in û encax bi tifaq û dan û standinê dikarin saz bikin.”
‘Divê banga Kongreya Neteweyî ji aliyê hemû siyasetmedaran ve bê kirin’
Kasim Firat banga Rêberê Gelê Kurd Abdullah Ocalan a ji bo pêkanîna Kongreya Neteweyî ya Kurd jî wiha nirxand: “Kê ev bang kiribe tiştekî rast gotiye. Bila Başûr, Bakur, Rojava û Rojhilat hemû werin berhev. Heke weke misyona Şêx Seîd Efendî tiştek bikeve ser milê me em hazir in wê fedakariyê bikin û tiştekî jî naxwazin civaka Kurd ji me re bes e. Bangeke maqûl e divê ev bang ji aliyê hemû siyasetan ve were kirin. Di nava van 10 salan de min jî gelek cehd kir, çi li Bakur, çi li Rojava çi li Rojhilat çi li Başûr ez çûm cem gelek siyasetmedaran. Me ji hemûyan xwest ku werin li ser tifaqê hevkariya xwe bikin. Lê mixabin çênebû û gotina me pere nekir. Îşelah wê ji niha şunde pere bike. Weke çapemenî wezîfeya we muhîm e, ev bar li ser milê we ye. Divê hûn jî di vî warî de bikevin nava hewldanan bila Kurd li ser hevkariyên xwe tifaqê çêbikin. Rojên geş û xweş yên me Kurdan e.”
