Kurd û Kurdistan niha di demekî gelekî tenik de derbas dibe. Biryarên ku di vê dema de tê dayîn, dikare çarenûsa me ya bi sedan salan biguherîne. Ji bo vê jî Newroz dikare mohra xwe li vê pêvajoya aştiyê bixe.
Ez nizanim bê çima bes di meha Adar ê de, bi taybet di dema Newrozê de dilê min him kêfxweş him jî xemgîn dibe. Kêfxweş dibim ji ber ku hemû cîhan, xweza û gerdûn kêfxweş dibe. Dar û ber ji nû ve zindî dibin, terş û tilêr ji xewa zivistanê hişyar dibin û ji nû ve hêlîn û warên xwe ava dikin. Kêfxweş dibim, ji ber ku bênavber strana rehmetiyê Aram Tîgran bi van gotinan di guhê min de ye:
Newroz e Newroz e,
Sibe ye Newroz e,
Maçek bide min yar
Cejna te pîroz e!
Xemgîn jî dibim ji ber ku di dîrokê de – him di meha Sibatê de û him jî di meha Adarê de gelek rojên şûn û reş jî hene. Her sal dewletên mêtinger û dagirker dixwazin hejmarên din li van rojên şûn û reş zêde bikin. Dîsa îsal çend roj berê dewleta tirk a dagirker û qirker bi êrîşek hovane Kurdên Rojava qetil kir.
Ji ber ku Newroz cejna herî girîng ji bo gelê Kurd e, ji bo diyarkirina rojeva wan jî diyarker e. Tevlêbûna Newrozê, sekna gelê Kurd di Newrozê de, dirûşmên ku di şahiyên Newrozê de tên berzkirin, bandora xwe li hemû salê dike. Dikare moral û motîvasyona Kurdan a hemû salê diyar bike. Ji bo wê jî tevlêbûna Newrozê gelekî girîng e. Sekna Kurdan gelekî girîng e. Peyam û dirûşmên ku ew ê bên berzkirin gelekî girîng e. Îsal jî wek gelek salên borî ji bo Kurdan saleke gelek girîng e. Ev sal ne tenê ji bo Kurdan her wiha ji bo hemû Rojhilata Navîn jî pir girîng e.
Derheqê dîrok û girîngiya Newrozê de min gelek nivîsên din nivîsandine, ez naxwazim li vir wan daneyan dubare bikim. Lê xalek gelek girîng e – ew jî ew e ku Newroz cejn û şahiya Kurdan a herî kevnar e. Ev rastî tenê ji bo balkişandina ser girîngiya wê ya ji bo civaka Kurd bes e.
Lê Newroz ne tenê Newroz e, ne tenê şahî û cejneke, her wiha sembola tekoşîna gelê kurd ji bo azadiya xwe ye jî. Newroz şaneya berxwedan û serhildana gelê kurd li himber dagirkeriyê, li himber zordariyê ye. Ji bo wê jî mirov tenê wek cejnek an jî şahiyek binirxîne, ew ê kêm be.
Wek ku tê zanîn îsal çend hefte berî Newrozê Rêberê Gelê Kurd Abdullah Ocalan pêvajoyek nû destpê kir. Ev pêvajo sê şaxên wê yê girîng hene. Yekemîn ji bo gelê tirk û Tirkiyeyê firseta dawî ye, ji bo ku 100 salên pêşiya me de di nava azadî û aramiyê bijîn. Duyemîn ji bo gelê kurd pir girîng e, ji ber ku destkeftiyên bakurê Kurdistanê dikare bandorek erênî li hemû parçeyên din bike – bi taybet li ser statuya Rojava. Sêyemîn jî peyam ji bo Tevgera Azadiya Gelê Kurd e ji bo ku xwe nû bike. Rastiyek heye dibê em baş fêm bikin. Guhertinên heya niha hiştiye ku Tevgera Azadiya Gelê Kurd li ser lingan bimîne û serkeftî be. Gotinek pir girîng heye ji bo guhertinê, dibêje: “Yê ku bi demê re neçe, ew ê bi demê re biçe.“ Dixwaze bêje ku yê bi demê re nemeşe, ew ê bi demê re biçe û di nava dîrokê de winda bibe. Peyama sêyemîn wek min got ji bo Tevgerê bi xwe bû – ji bo ku xwe biguherîne û nekeve nav dubareyan.
Kurd û Kurdistan niha di demekî gelekî tenik de derbas dibe. Biryarên ku di vê dema de tê dayîn, dikare çarenûsa me ya bi sedan salan biguherîne. Ji bo vê jî Newroz dikare mohra xwe li vê pêvajoya aştiyê bixe. Tu kesî heta niha ji aştiyê winda nekiriye. Lê dibê destkeftî û azadiya Kurdan herwiha xeyala azadiya Kurdistan bingeha vê pêvajo û hemû pêvajoyan be.
