Bernameya Newroza “Rêbertiya Azad, Civaka Demokratîk” a Amedê bi rêzgirtina ji bo cangoriyên Kurdistanê û axaftina Komîteya Amadekar dest pê kir. Li qadê posterê mezin ê Rêberê Gelê Kurd Abdullah Ocalan vekirin.
Newroza îsal bi şiyara “Rêbertiya Azad, Civaka Demokratîk” ji hêla DEM Partî, DBP û TJAyê ve tê lidarxistin. Ji saetên serê sibehê ve bi de hezaran kes tên qada Newrozê, her ku diçe qad tije dibe. Ji hêlekî ve bi deh hezaran welatî tên qadê û ji hêlekî ve jî bi deh hezaran welatî li qadê li ber stran, def û ziranan govendê digerînin û Newroza Azadiyê pîroz dikin. Gelek mêvan jî hatin cihê protokolê û beşdarî pîrozbahiyê bûn. Bi deh hezaran welatî li bin siya wêneyê Rêberê Gelê Kurd Abdullah Ocalan û Şandeya Îmraliyê yê di 27ê Sibatê de li Girtîgeha Girava Îmraliyê hatiye kişandin Newroza xwe pîroz dikin.
Dilsoziya bi Abdullah Ocalan re
Her ku diçe qad tije dibe û îsal li bendê ye ku bi ser milyonek mirov re beşdarî Newrozê bibe. Bi deh hezaran bênavber dirûşmên “Bijî Serok Apo”, “Bê Serok jiyan nabe” û “PKK gel e, gel li vir e” berz dikin. Her wiha posterên Rêberê Gelê Kurd Abdullah Ocalan li qadê tên gerandin û xelk dilsoziya xwe ya bi Abdullah Ocalan re tînin ziman.
Rêzgirtina ji bo cangoriyan
Bernameya Newrozê dest pê kir, pêşkêşkêvanên bernameya Newrozê cejnê li tevahiya Kurdistanê û bi gelek zimanan Newroz pîroz kirin. Piştî pîrozbahiyê ji bo cangoriyên azadiya Kurdistanê rêz hat girtin. Bi deh hezaran kes bi yek dengî dirûşma “Bijî Serok Apo” berz kirin.
Bi ruhê bangê Newrozê pêşwazî kirin
Li ser navê Komîteya Amadekar a Newrozê Hevseroka DEM Partiya Amedê Gulşen axivî û Newrozê li gel pîroz kir û bi xêrhatina gel kir. Gulşen Ozer da zanîn ku ew silavên xwe û pîrozbahiya Newrozê ji çar aliyê Kurdistanê û hemû cîhanê re dişînin. Gulşen Ozer anî ziman ku ew îsal bi ruhê banga dîrokî ya Rêberê Gelê Kurd Abdullah Ocalan pêşwazî li Newrozê kirin. Gulşen Ozer destnîşan kir ku ew di şexsê Rêberê Gelê Kurd de silavên xwe ji hemû girtiyên zindanan re dişînin. Gulşen Ozer bal kişand ser girîngî û wateya Newrozê û got ku wê Newroz rojên nûjen ji wan re bîne.
Piştî axaftina Komîteya Amadekar stranbêjê ribabê Hozan Fîkret û Şerîf derketin ser dikê û gel li ber stran û muzîkê coşandin.
