Wan – Endam, rêveber û nûnerên DEM Partiyê ku li Miksê beşdarî çalakiya nobetê bûn, bi meşeke girseyî qeyûm şermezar kirin.
Dewletê di 29ê Mijdarê de qeyûm tayînî Şaredariya Miksê kir. Li dijî tayînkirina qeyûm nobet û çalakiya gel di roja 3yan de didome. Girseya ku Parlamenterê DEM Partiyê, hevserokên bajar û navçeyan, hevşaredar, endamên meclisa şaredariyê, nûnerên rêxistinên civaka sivîl û welatî beşdar bûn, ji bo qeyûm şermezar bike, bi dirûşma “Qeyûm talan e berxwedan jiyan e” meşiyan. Girse ji pêşiya avahiya DEM Partiyê ya Miksê heta şaredariyê meşiyan. Girseyê di meşê de dirûşma“Qeyûm talan e berxwedan jiyan e” berzkirin. Hevşaredarê Miksê Ayvaz Hazir anî ziman ku dîroka gelê kurd dîroka berxwedanê ye û teqez paşvegavê neavêjin.
Hevşaredara Miksê Nebahat Benek jî anî ziman ku dê derê vala nehêlin û got: ” Em ê îradeya gel radestî kesên hatine tayînkirin nekin. Em ê têbikoşin. Xelkê Miksê dê xwedî li îradeya xwe derkeve.”
Hevseroka DEM Partiyê ya Bajar Gulşen Kurt jî anî ziman ku polîtîkaya tunekirin û tunehesibandinê ya li dijî kurdan didome û wiha axivî “Ma AKPê di nava van 22 salan de ji bilî bêkariyê, komkujiyên jinan, talankirina xwezayê û dewlemendkirina alîgirên xwe ji bo vî welatî çi kiriye? Hûn jî rewşa Miksê dibînin Rê tune ye, av tune ye, tu tiştek tune ye. Ev gel dê xwedî li îradeya xwe dekeve. Hûn nikarin bi dosyayên çêker û bi kompasan îradeya gelê me xesp bikin.”
Piştî daxuyaniyê çalakiya rûniştinê hat lidarxistin. Nobet, bi serdana didome.
