Hevserokê Meclîsa Gel a Şêxmeqsûd û Eşrefiyê Nûrî Şêxo diyar kir ku komên çete yên kirêkirî dixwazin komkujiyan li taxan pêk bînin û komkujiyan li ser gel pêk bînin. Şêxo bang li gelê Kurd kir ku ji bo Helebê dakevin qadan.
Çeteyên hikûmeta demkî ya Şamê ku girêdayî Tirkiyeyê ne, li dijî taxên Kurdan Şêxmeqsûd, Eşrefiyê û Benî Zêd ên Helebê êrişên giran pêk tînin. Êrîş û dorgirtina li ser taxan didome. Çeteyên bi navê “Odeya Operasyonê ya Artêşa Sûriyê” vê şeveqê daxuyaniyek belav kir û angaşt kir ku dê saet di 15:00an de êrişî taxan bike û şer îlan kiribû.
Komên çete bi her cure çekên giran êrişî her sê taxan dike. Nerazîbûn û hêrsa gelê Kurd jî li dijî taxan berdewam dike.
Hevserokê Meclîsa Gel a Şêxmeqsûd û Eşrefiyê Nûrî Şêxo tev li bernameya Nîvroj a Stêrk TV bû û geşedanên dawî nirxand.
‘Dê komkujiyan bikin’
Nûrî Şêxo anî ziman ku êrişên komên çete ji duh nîvro ve heta niha didomin û wiha got: “Çete bi hemû çekên giran êrişî taxên me dikin. Êrişên bêserûber topbaran dikin. Li dijî gelê Şêxmeqsûd û Eşrefiyê komkujiyek hatiye plankirin. Bi ragihandin û hemû hêza xwe êrişî taxên me dikin. Ji van êrişên giran xuya dibe ku komkujî ne dûr in. Dê komkujiyan bi ser gelê me de pêk bînin.”
‘Tirkiye çeteyan têr û tije kiriye’
Nûrî Şêxo destnîşan kir ku kesên ku êrişî taxan dikin hêzên kirêkirî ne û şandine ser serê gel û got: “Ji bo destilata Sûriyê li dijî me şer dikin. Tirkiyeyê jî van çeteyan têr û tije kiriye. Tirkiye di warê çekan de piştgiriya çeteyan dike. Yên ku wisa êrişî me dikin dê komkujiyan jî pêk bînin. Ev çete xwînxwar in. Heta niha li her derê komkujiyan pêk anîne. Niha jî ev çeteyên kirêkirî dixwazin bi êriş û rêya ragihandina xwe taxên Eşrefiyê, Şêxmeqsûd û Benîzêd vala bikin. Dixwazin tirsê têxin nava gelê me. Tirsa ku wê saet di sisêyan de êriş bikin, dixin nav gel.”
‘Gel dest ji taxên xwe bernade’
Nûrî Şêxo da zanîn ku gelê Kurd ên li taxan li dijî êrişan xwedî helwest e û dest ji taxên xwe bernade û got: “Gel li dijî van êrişan li ber xwe dide. Gel li kêleka asayîşa xwe ye. Armanc û hedefa van çeteyan ew e ku taxan ji mirov û niştecihan vala bikin.”
‘Divê hêz3en garantor pêşî li komkujiyan bigirin’
Nûrî Şêxo da zanîn ku divê gelê Kurd li çar aliyên Kurdistanê û Ewrûpayê dakeve qadan û êrişên li ser taxên Kurdan protesto bikin.
Nûrî Şêxo bang li hêzên navneteweyî kir û got: “Di heman demê de divê hêzên garantor bi lez pêşî li vê komkujiyan bigirin.”
