Belavkarê rojnameya Ozgur Gundemê Orhan Karaagar di salvegera xwe ya 33yemîn de li ser gora xwe ya li taxa Xaçortê hate bibîranîn.
Belavkarê rojnameya Ozgur Gundemê Orhan Karaagar ku di 19ê Çileya sala 1993yan de ji aliyê hêzên dewletê ve hatibû kuştin, bi pêşengiya DFG û MKGê li ser gora xwe ya li Goristana Xaçortê ya li Navçeya Rêya Armûşê ya Wanê hate bibîranîn. Hevşaredarê Bajarê Mezin Abdullah Zeydan ê ku qeyim danîne şûna wî, Hevseroka DBPê Gonûl Uzunay, endam û rêveberên saziyên civakî yên Wanê, malbatê Karaagar, rojnameger û gelek welatî tev li bîranînê bûn.
‘Em ê her dem li pey şopa wan bin’
Bernameya bîranînê bi deqeyekê rêzgirtina ji bo şehîdên Çapemeniya Azad dest pê kir. Piştre li ser navê Çapemeniya Azad endama MKGê Zeynep Dûrgût axivî. Zeynep Dûrgûtê bi bîr xist ku ji salên 90î heta niha êriş li ser Çapemeniya Azad qut nebûne û got: “Di salên 90î de li ser gelê Kurd polîtîkayên tarî û qirêj hebûn. Di rewşeke wisa de heval Orhan û yên wekî wî li hember vê taritiyê dengê heqîqetê radigihand gel. Ew çiraya ku wan pêxistiye dê tu carî venemire. Em ê her tim li dû şopa wan bin û nehêlin heqîqet di tariyê de bimîne. Wekî tê zanîn îro di heman demê de roja kuştina Hirant Dînk e, em wî jî li vir bi bîr tînin.”
‘Bi kuştinê nikarin hezkiriyên me ji me veqetînin’
Paşê birayê Orhan Karaagar, Nîzam Karaagar axivî. Nîzam Karaagar da zanên ku Xwedê jî kuştinê naxwaze û ew kes û hişmendiya ku Orhan kuşt Xwedê nenas in. Nizman Karaagar destnîşan kir ku Kurd bi salan in ji bo ku mafê xwe yê herî rewa bidest bixin tên kuştin û got: “Lê bila zalim bizanibin bi kuştinê nikarin hezkiriyên me ji me biqetînin. Ew her tim bi me re ne, bi navê xwe, bi deng û bîranînên xwe bi me re dijîn.”
‘Rêber Apo hewl dide Kurdan ji sosyolojiya mirinê rizgar bike’
Nîzam Karaagar bal kişand ser pêvajoya Aştî û Civaka Demokratîk jî û wiha axivî: “Îro em di pêvajoyeke nû de ne. Rêber Apo bi salan e hewl dide gelê Kurd ji vê sosyolojiya mirinê rizgar bike û bike sosyolojiya azadiyê têdikoşe. Em bawerin em ê di vê têkoşînê de serbikevin.”
Herî dawî hevseroka DEM Partiyê ya Wanê Gulşen Kurt axivî. Gulşen Kur jî Orhan Karaagar bi bîranî û da zanîn ku Orhan di demên herî zor û zehmet de bû dengê zarokan, dengê jinan, dengê civak û heqîqetê.
Bîranîn bi danîna qerenfîlan a li ser gorê bi dawî bû.
