Amed – Parêzer Resul Temur têkildarî êriş û zextên li ser rojnamegerên Kurd di demên dawî de zêde dibin axivî û anî ziman ku çapemeniya azad dema zimanê xwe yê rojnamegeriyê dihûnîne, destpêkê heqîqetê esas digire û piştre rojnamegeriyê li ser vê heqîqetê dike.
Çeteyên HTŞ dema 6ê Çileyê êrişê Rojavayê Kurdistanê kir û dest bi şerekî qirêj kirin di gelek deverên cîhanê gel ji bo parastina Rojava daket qadan û çalakî lidar xistin. Li Bakûrê Kurdistanê jî li hemû bajaran gel derdikevin qadan û meş û çalakî bê navber didomin. Li gelek deveran hêzên dewletê êrîş dibin ser çalakvanan. Dema polîs êrîşê gel dike, rojnamevan jî dibin hedefa van êrîşan.
Nûçegîhanê Ajansa Welat Nedîm Oruç roja 14ê Çileyê dema li Cizîrê çalakiya ciwanan dişopand ji hêla polîsan ve bi lêdanê hate binçavkirin û piştî 3 rojan bi tawanbariya “Probagandaya rêxstinê” hat girtin.
21ê Çileyê jî ji bo piştevaniya Rojava, li navçeya Nisêbîn a Mêrdînê bi beşdariya hezaran kes meş hat lidarxistin û polîsan êrişî girseyê kir û gelek kes binçav kir. Di êrîşa polîsan de Hevseroka Komeleya Rojnamegeran a Dîcle Firatê Kesîra Onel, rojnameger Heval Onkol, Ferhat Akinci, Pelşîn Çetînkaya, Muhammet Alî Yilmaz û Bariş Demîrcan hatin binçavkirin. Rojnamegerên kû hatibun binçavkirin 23ê Çileyê hatin berdan.
Parêzer Resul Temûr ê ku parêzvaniya rojnamegeran dike têkildarê êrişên ser çapememiya azad û girtina nuçegîhanê Ajansa Welat Nedîm Oruç, ji ajansa me re axivî.
‘Dixwazin rastiyan ji civakê dur bêxin’
Resul Temur da zanîn ku çapemeniya azad dema zimanê xwe yê rojnamegeriyê ava dike, destpêkê heqîqetê esas digire. Tamur diyar kir ku rojnamegerên Kurd rojnamegeriya xwe jî li ser vê heqîqetê ava dikin û wiha berdewam kir: “Îro jî çapemeniya azad êrişên ku li ser Rojava pêk tên dixe rojeva civakê. Ji ber vê sedemê, êrîş û astengiyên li ser çapemeniya azad her tim zêdeye. Dema ku di navbera Rojava û gelê Kurd de astengekê deynin, hedefa ewil dibe çapemeniya Kurd. Eger rastiyên ku çapemeniya azad dinivîse negihîjin civakê, li şûna berxwedana Rojava, meyê nûçeyên faaliyeta operasyonel a asayî ya ku ji aliyê dewletên Sûrî û Tirkiyeyê ve tê birêvebirin bixwenda. Ji ber vê sedemê, ji bo rastiyan ji civakê dûr bixin, çapemeniya Kurd a li qadê, careke din bi binçavkirin, girtin û astengiyan re rû bi rû dimîne.”
‘Nedîm ji ber xebata rojnamegeriyê hat binçavkirin’
Resul Temur dest nîşan kir ku Nedîm Oruç, dema bertekên gelê Kurd ê ku li hemberî bûyerên Rojava bêdeng nema dikir nûçe, hatiye binçavkirin û got: “Dîmenên di dema binçavkirinê de, li ber çavane ku Nedîm tenê ji ber xebata xwe ya rojnamegeriyê hatiye binçavkirin. Ji xwe beşek ji polîsên ku ew binçav kirin, ji ber şopandina wî ya çalakî û bernameyên li navçeya Cizîrê Nedîm nas dikirin. Îhtîmal e ku hêrsa wan ji vir tê. Ji ber ku rojnamegeriya Nedîm dizanin, wî bi darê zorê binçav kirin. Di îfadeya li emniyetê de îdia dikin ku ew çalakvan e û tawanbarkirin û pirsan li ser vê yekê şekil didin. Dema di nava 3 rojan de delîlek nedîtin ku ew tevlî çalakiyê bûye, dest bi lêkolîna hesabên wî yên medyaya dîjîtal kirin. Di heman demê de li ser înternetê lêkolîna çavkaniyên vekirî kirin û nûçeyên ku nav de wêneya Nedîm tê de hene bibînin û bikin hincet. Dest bi lêpirsîna nûçeyên ku wî şopandine û zimanê ku di nûçeyan de bikar aniye kirin. Herî dawî di dema kar û barên dozgerî û lêpirsînê de dest bi pirsîna pirsên derbarê ajansa ku lê dixebite kirin û di encamê de ji ber nûçeyên ku çêkiriye û parve kiriye bi tawana propagandayê wî girtin.”
Ji bo Nedîm dê îtîraz bê kirin
Resul Temur di dawiya axaftina xwe de hincetên bune sedema girtina Nedîm Oruç û têkildarî pêvajoya hiquqî ev tişt anî ziman: “Heta şopandina Nedîm a daxuyaniya çapemeniyê ya li Silêmaniyê ku wekî dîrokî dihate dîtin û vekişîna hêzên PKK’ê ya ji Tirkiyeyê li xwe digirt jî, wekî sûc tê dîtin. Lê belê bi dehan rojnamegerên ji Tirkiye, Iraq, Başûrê Kurdistanê û Ewropayê bi awayekî eşkere ev nûçe çêkirin. Ji Tirkiyeyê jî siyasetmedarên ji her beşî nêrînên xwe yên erênî yên derbarê vê daxuyaniyê de anîn ziman. Em wekî parêzerên Nedîm Oruç, li dijî girtina wî îtîrazê dikin. Ji ber ku meqama rayedar a ji bo îtîrazê Dadweriya Sûlh Cezayê ya Sêrtê ye, em hêvî dikin ku ji Dadweriya Sûlh Cezayê ya Şirnexê cudatir li mijarê binêre û biryara berdanê bide. Ger bernedin emê li benda amadekirina îdianameyê û destpêkirina darezandina li Dadgeha Cezayê Giran bin.”
