Heyeta Îmraliyê ya DEM Partiyê serdana Hevserokê Giştî yê HDPê yê berê Selahattîn Demîrtaş kir û piştî hevdîtinê daxuyanî da. Pervîn Bûldan diyar kir ku civak jî dizane Demîrtaş were berdan dê bandorekî baş bide pêvajoyê. Divê Demîrtaş demildest were berdan. Mîthat Sancar jî got: “Heke Demîrtaş were berdan dê ji bo pêvajoyê bixebite. Jixwe ew jî dixwaze bi awayekî çalak tev li pêvajoyê bibe. Berdana Demîrtaş baweriya pêvajoyê ya civakê jî dê zêde bike.”
Endamên Heyeta Îmraliyê ya DEM Partiyê Pervîn Buldan û Mîthat Sancar li Girtîgeha Tîpa F a Edîrneyê serdana Hevserokê Giştî yê HDPê yê berê Selahattîn Demîrtaş kir. Heyetê piştî hevdîtinê li pêşiya girtîgehê daxuyanî da.
Li vir ewilî Pervîn Buldan axivî û diyar kir ku seat 1ê hevdîtin destpê kir û nêzî 3 saetan hevdîtin berdewam kir û got: “Me bi Selahattîn Demîrtaş û Selçuk Mizrakli re hevdîtinekê demdirêj kir. Her du hevalên me pêvajoyê dişopînin. Lê rewşa pêvajoyê baş nikarin bişopînin, ji ber ku di girtîgehê de ne. Selahattîn Demîrtaş bi salan e li vir e. 3 caran DMMEyê biryara berdanê da. Civak jî dizane Demîrtaş were berdan dê bandorekî baş bide pêvajoyê. Heke pêvajo hebe divê gavên demokratîk bên avêtin û Demîrtaş were berdan. Ji bo pêvajoyê zagon tê amadekirin lê ji bo berdana Demîrtaş û Selçuk Mizrakli zagon ne hewceye. Divê Selahattîn Demîrtaş û Selçuk Mizrakli werin berdan. “
‘Demîrtaş jî dixwaze ji bo pêvajoyê bixebite’
Mîthat Sancar jî anî ziman Selahattîn Demîrtaş û Selçuk Mizrakli dixwazin alîkarî bidin pêvajoyê û ev tişt got: “Selahattîn Demîrtaş û Selçuk Mizrakli bêhiqûqî tên girtin. Ji bona wê divê hiqûq pêk were û her du werin berdan. Berdana Demîrtaş hewcedariya pêvajoyê ye jî. Heke Demîrtaş were berdan dê ji bo pêvajoyê bixebite. Jixwe ew jî dixwaze ji bo pêvajoyê bixebite. Ji bo pêvajoyê û baweriya hiqûqê divê Demîrtaş were berdan. Berdana Demîrtaş baweriya hiqûq û pêvajoyê ya civakê jî dê zêde bike. Em li bendê ne ku hevalên me werin berdan:”
