Enqere – Hevalê Edward Saîd profesorê Îranî Hamid Dabashi tekildarî pêvajoya Aştî û Civaka Demokratîk ji DEM Partiyê re nameyek şand û di nameyê de destnîşan kir ku banga dîrokî ya Rêberê Gelê Kurd Abdullah Ocalan di vê serdema aloz de banga herî şoreşger e.
Pisporê Îranî Hamid Dabashi li ser pêvajoya Aştî û Civaka Demokratîk ji Partiya Wekhevî û Demokrasiyê ya Gelan (DEM Partî) re nameyek şand. Nameya Hamid Dabashi wiha ye: “Hevalên ezîz, min bi kêfxweşiyeke mezin banga dîrokî ya Birêz Abdullah Ocalan ku çareseriyeke demokratîk û aştiyane ya pirsgirêka Kurdî pêşniyar kiriye pêşvazî kir. Ev, li gorî min, nîşaneyeke bilind a gihîştîbûna siyasî ye ku kêm caran li qada cîhanî tê dîtin! Bingeha exlaqî ya vê gaveke siyasî ya bi hîkmet hatî avêtin, ne tenê ji bo pirsgirêka Kurd-Tirk, her wiha ji bo paşeroja herêmê jî wê bandoreke mayînde çêbike. Li gorî min, ev gav di vê serdema aloz de, gaveke herî şoreşger û herî dilpak e ku rêberekî siyasî yê biaqil dikare bavêje.
Hamid Dabashi kî ye
Hevalê Edward Said, Hamid Dabashi, li Zanîngeha Columbia Profesorê Lêkolînên Îranê yê Hagop Kevorkian û Edebiyatê ye. Di sala 1984an de ji Zanîngeha Pennsîlvaniayê di warên Sosyolojiya Çandî û Lêkolînên Îslamî de du doktorayên xwe wergirtine û piştre li Zanîngeha Harvardê bûrseke lêkolînê ya post-doktorayê wergirtiye. Teza wî ya doktorayê, bi hevkarîya rexnegirê çandî yê Freudyen ê herî navdar ê wê demê Philip Rieff (1922-2006) re, li ser teoriya desthilatdariya karîzmatîk a Max Weber hatiye nivîsandin. Profesor Dabashi li gelek zanîngehên Amerîkaya Bakur, Ewropayê û Îranê ders û konferans daye. Profesor Dabashi niha (ji sala 2020’an û vir ve) li MESAAS’ê Midûrê Lêkolînên Lîsansê ye. Di paşerojê de wî wekî Serokê Beşê û Midûrê Lêkolînên Lîsansa Bilind kar kiriye. Ew endamekî damezrîner ê Enstîtuya Edebiyat û Civakê ya Berawirdî, endamekî damezrîner ê Navenda Lêkolînên Filistînê û serokê Komîteya Bingehîn a Koleja Columbia bûye.Profesor Dabashi zêdetirî bîst pirtûk nivîsandine, çar pirtûk edîtorî kirine û ji gelekên din re beşdarî beşan kiriye. Her wiha, ew nivîskarê zêdetirî 100 esey, gotar û rexneyên pirtûkan e li ser mijarên wekî Lêkolînên Îran û Îslamê, edebiyata berawirdî, sînemaya cîhanî û felsefeya hunerê (trans-estetîk). Pirtûk û gotarên wî bo gelek zimanan hatine wergerandin, di nav de Japonî, Elmanî, Fransî, Spanî, Danîmarkî, Rûsî, Îbranî, Îtalî, Erebî, Koreyî, Farisî, Portekîzî, Polonî, Tirkî, Urdû û Katalanî.Wekî yek ji dengên muxalif ên sereke yên Dewletên Yekbûyî, ku li çar aliyên cîhanê gelek caran konferans û dersan dide, Dabashi bi hevjîna xwe ya Îranî-Swêdî, navdara tevgera femînîst Golbarg Bashi re, li New Yorkê dijî.
