Dayikên Şemiyê di Cejna Qurbanê de jî dîsa daketin Qada Galatasarayê û li aqûbeta windayan pirsîn. Endama Komisyona Windayan a ÎHDê Zeynep Yildiz, anî ziman ku Veysel Guney di 28ê kanûna 1980yî de li malê binçav kirin û piştre di 10ê hezîrana 1981ê de darve kirin û got: “Piştî darve kirin cenazeyê wî winda kirin.”
Dayikên Şemiyê bi boneya aqûbeta windakiriyan bipirsin, di hefteya Hezar û 54an de dîsa li Qada Galatasarayê kom bûn û daxuyanî dan. Dayikên Şemiyê û parazvanên mafên mirovan ku li Qada Galatasarayê kom bûn, vê hefteyê aqûbeta Veysel Guney ê di serdema darbeya 12ê Îlonê de hat girtin û piştre hat darvekirin pirsîn. Berdevka Meclisa Jinan a DEM Partiyê Halide Turkoglu jî beşdarî daxuyaniyê bû. Endama Komîsyona Windayan a ÎHDê Zeynep Yildiz, anî ziman ku xizmên girtiyan gora zarokên wan ên ku di Cejnan de biçin ziyaret bikin tune ye û wiha got: “Dayik ji bo qurnefilê dînin ser gorên xizmên xwe tên Qada Galatasarayê. Veysel Guney ê 24 salî di serdema darbeya leşkerî ya 12ê Îlonê de winda kirin. Di 28ê kanûna 1980yî de li Dîlokê bi ser mala wî de girtin û binçavkirin. Li 2yemîn Dadgeha Leşkerî ya Awarte ya Herêma Edeneyê hat darizandin. Danişîna ewil di 6ê sibata 1981an de pêk hat. herî dawî di 10ê Hezîrana 1981an de ceza kirin û li Girtîgeha Tîpa E ya Dîlokê darve kirin. Piştî darve kirin cenazeyê wî winda kirin. Serbaz Burhan Erdem belgeya bi hêjmar 266an dan û gotin me cenaze daye. Lê cenaze teslîmî malbatê nekirin. Malbat û xizmên Guney bi salan li cenaze geriyan. Lê hîn ne cenaze û ne jî gora Veysel Gunay li holê heye. Veysel Gunay darve kirin û cenazeyê wi winda kirin.
Piştî çalakiyê Dayikên Şemiyê qurnefil danîn Qada Galatasarayê û belav bûn.
