Li navçeya Erdîşê ya Wanê Newroza 2026an bi tevlîbûna 10 hezaran hat pîrozkirin. Di Newrozê de daxwaza azadiya fîzîkî ya Rêberê Gelê Kurd Abdullah Ocalan hat kirin û peyamên bilindkirina têkoşînê hatin dayîn.
Newroza 2026an a bi dirûşma “Azadî û Yekitiya Demokratîk” li navçeya Erdîşê ya Wanê li ber peravên Behra Wanê bi tevlêbûna 10 hezaran hat pîrozkirin. Di bernameya pîrozbahiya Newrozê de Parlementerê DEM Partiyê yên Wanê Gulderen Varli û Mahmûd Dîndar wek axêver cîh girtin. Wek hunermend jî Kasim Taşdogan tevî bernameyê bû. Di Newrozê de pankarta “Jiyana Azad dê bi Serokatiya Azad re Were” hat vekirin. Gelê Erdîşê bi cil û bergên xwe yên neteweyî herikî qada Newrozê. Bername bi deqeyekî rêzgirtina ji bo cangoriyên di têkoşîna azadî û demokrasiyê de jiyana xwe ji dest dane dest pê kir. Di dema rêzgirtinê de gelê Erdîşê bênavber dirûşma “Şehîd namirin” berz kir. Li qada Newrozê dirûşm “Bişî serok Apo” olan dan.
Li ser navê komîteya Amadekar a Newrozê Rozerîn Canpolatê xêrhatina gel xwest, Salih Muslîm bibîranî û got: “Ji bo em biserkevin yekane rê xebat û xwe rêxistinkirin e. Em Newroza 2026an diyarî Serok Ocalan dikin û em hêvîdar in demildest birêz Ocalan bigihêje azadiya xwe ya fîzîkî.” Piştre Hevserokên navçeyê yên DEM Partiyê Yasemîn Agaoglû û Mahmût Pala gel silav kirin û Neroza gel pîroz kir.
‘Divê azadiya fîzîkî ya Birêz Ocalan pêk bê’
Hevserokê DBPê Veysî Dîlekçî jî xêrhatina gel kir, Salih Muslîm bibîranî. Dîlekçî li ser girîngiya yekîtiya neteweyî sekinî û got: “Di 27ê Sibata 2025an de Rêberê Gelê Kurd daxuyaniyek da û ev 2 sal in em Newrozên xwe di pêvajoya Aştî û Civaka Demokratîk de pîroz dikin. Gelê Kurd ev 2 sal in li banga Bîrêz Ocalan xwedî derdikeve. Gelê Kurd û Tevgera Azadiyê gelek gav avêtin. Divê Dewlet jî demildest gavên pêwîst bavêje û bi lez û bez şart û mercên ku Birêz Ocalan baş bike ku karibe wek azad bixebite. Divê girtiyên siyasî bên berdan, zextên li ser çand, ziman û nasnameya gelê Kurd bi dawî bibin. Divê dewlet qanûn înkarê biguherîne.”
Veysî Dîlekçî herî dawî bal kişand ser şerê di navbera DYA-Îsraîl û Îranê û got: “ Tekane rêya çareseriya pirsgirêkên li Rojhilata Navîn paradîgmaya Rêberê Gelê Kurd Abdullah Ocalan e.”
‘Ji bo jiyaneke azad û birûmet em ê têbikoşin’
Parlementer DEM Partiyê ya Wanê Gulderen Varli bal kişand ser girîngiya pêvajoya Aştî Civaka Demokratîk û wiha axivî: “Em ê yekitiya neteweyî û aştiyê ku birêz Ocalan mîmarê wê ye, gund bi gund, tax bi tax, bajar bi bajar rêxistin bikin. Ji bo ku aşitî bê van axan, jiyaneke azad, wekhev û birûmet bê avakirin em ê bi hemû hêza xwe ve, bi şev û roj bixebitin.”
‘Yek e yek e yek e, gelê Kurd yek e’
Herî dawî Parlementerê DEM Partiyê yê Wanê Mahmûd Dîndar axivî. Dîndar Salih Muslim, Helbestvan Ahmed Huseynî û Kedkarê Çapemeniya Azad Osman Kiliç bibîranî. Mahmût Dîndar bal kişand ser komplogeriya hêzên hegemonîk û wiha derbirî: “Hêzên hegomonîk dixwazin wek Dersimê, Geliyê Zîlanê li ser gelê Kurd komkujiyan pêk bînin. Lê me dît, di êrişên li ser Rojava de gelê Kurd bi dirûşma ‘Yek e yek e yek e gelê Kurd yek e’ bersiv da wan û komkujî asreng kir. Îro roj roja xurtkirina yekitiya neteweyî ya demokratîk e. Ji bo vê jî divê em zêdetir xwe birêxistin bikin, bixebitin. Azadiya Rêberê Gelê Kurd pêk bînin.”
Piştî axaftinan Dayikên Aştiyê agirê Newrozê pêxist û gel li dor agir bi stranên Hunermend Kasim Taşdogan re govend gerand.
