Amed – Platforma Saziyên Demokratîk a Amedê derbarê “Meşa Azadiyê” ku dê li dijî Komploya 9ê Cotmehê were lidarxistin, daxuyaniya çapemeniyê da û got: “Em ê ji bo azadiya gelan bimeşin.”
Platforma Saziyên Demokratîk a Amedê bi boneya Komploya Navneteweyî ya 9ê Cotmehê ya li dijî Rêberê Gelê Kurd Abdullah Ocalan hatiye pêkanîn, dê di 9ê Cotmehê saet 16:30an de li Qada Şêx Seîd a Amedê “Meşa Azadiyê” li dar bixe. Platformê têkildarî meşê daxuyaniya çapemeniyê da. Daxuyanî li avahiya Partiya Wekhevî û Demokrasiyê ya Gelan (DEM Partî) hat dayîn û pankarta “Bi Rêbertiya Azad Ber Bi Civaka Azad Ve” hat daliqandin.
Tirkiya daxuyaniyê Hevserokê DEM Partiyê yê Amed Abbas Şahîn, Kurdiya wê jî Aktîvîsta TJAyê Gulîstan Sariliyê xwend.
‘Ji bo Azadiyê em ê bimeşin’
Hevserokê DEM Partiyê yê Amedê Abbas Şahîn di axaftina xwe de bal kişand ser girîngiya “Meşa Azadiyê” û wiha got: “Komploya ku 9ê Cotmehê li ser Rêberê Gelê Kurd Abdullah Ocalan hate pêkanîn bû sedem ku 26 salan li ser Rêberê Gelê Kurd Abdullah Ocalan tecrîd bê meşandin. ruxmê wan şert û mercên giran jî Rêberê Gelê Kurd Abdullah Ocalan xwe gihand gel, têkiliya xwe bi gel re qut nekir. Ji bo civaka demokratîk divê derfet bên avakirin. Ji bo Rêberê Gelê Kurd Abdullah Ocalan divê şert û mercên xebatê yên azad bên avakirin. Em di 9ê cotmehê de ji bo Reberê Gelê Kurd Abdullah Ocalan li qada Şêx Seîd dimeşin. Em her kesê vedixwînin meşa xwe.”
‘Em ê ji bo azadiya girtiyan li qadan bin’
Aktîvîsta TJAyê Gulîstan Sariliyê jî bal kişand ser Meşa Azadiyê û ev tişt gotin: “Hûn jî dizanin 26 sal berê li dijî Rêberê Gelê Kurd Abdullah Ocalan komploya navneteweyî hat pêkanîn. Em li dijî komploya di 9ê Cotmehê saet 16:30an de li qada Şêx Seîd dest bi meşê dikin. Daxwaza me ew e ku gelê me beşdarî meşa me bibe. Mêşê em wek Platforma Saziyên Demokratîk pêk tînin. Ji bo azadiya girtiyên me em ê li qadan bin. Ji bo jiyaneke azad û xweş, em ê bimeşin.”
