Endamê Meclisa PJAKê Rêwar Awdanan diyar kir ku ti alîkarî û cûre çek ji Amerîkayê negirtiye û got: “Armanca me ya esasî parastina civakê ye.”
Endamê Meclisa Partiya Jiyana Azad ya Kurdistanê (PJAK) Rêwar Awdanan di hevpeyvînekê de ya bi Qenala BBC beşa Farisî re îdiayên wergirtina çekên ji aliyê Amerîkayê ve red kir û nêzîkatiya PJAKê ya ji bo rewşê nirxand.
Rêwar Awdanan diyar kir ku PJAK di çarçoveya rêxistin û xweparastina rewa de li hemberî Komara Îslamî têkoşîn dikin û got: “Em naxwazin Kurdistan bibe qadeke ya şerê giştî. PJAK xwedî bernameyeke giştî ye ji bo hemû Îranê.”
Endamê PJAKê Rêbwar Adwanan têkildarî têkiliyên bi welatên derve re jî ev got: “Ti têkiliya me li gel saziyeke îstixbaratî nîne û em hewl didin diyalogê bi kesên ku dixwazin rejîma Îranê hilweşînin re çêbikin. Ev yek jî bi şertê ku civak navenda nîqaşê be, armanca me ya esasî parastina civakê ye.”
Rêbwar Adwanan li ser îdiayên ku hêzên Kurdî çekên Amerîka girtine jî ev nirxandin kir: “Me ti alîkarî, cûre çek û amûrên leşkerî ji Amerîka negirtine. Hêzên me çek û amadekariyên ji bo projeya xwe heye û hêzên me amade ne. Gerîlayên PJAKê sûd ji hemû ew ezmûnên sed salên borî yên ji bo parastina gelê xwe, nasname, nav û xaka xwe girtine. Her wiha PJAK sûd ji wan çekan girtiye ku bi xwe çêkiriye.”
Endamê PJAKê bal kişand ser Hevpeymaniya Hêzên Siyasî ya Rojhilatê Kurdistanê ya Îranê û wiha domand: “Em dixwazin Hevpeymaniya Partiyên Kurdî bibe dengê Kurdan û hêzeke leşkerî ya Kurd ava bikin ku Kurdan ji xeteriyan biparêze.”
Herî dawî Rêbwar Adwanan diyar kir ku hebûna wan ya li Başûrê Kurdistanê ne xeterî bû, têkoşîna wan ya li dijî DAIŞê vê yekê piştrast dike û got: “Li kudera Kurdistanê êriş hebe, Kurd wê biçin wir û parastina gel bikin.”
