Prof. Dr. Franco Cavallî bal kişand ser girîngiya modela Rojava û got: “Ji bo Rojhilata Navîn a demokratîk û aştiyane modela Rojava hêviya yekane ye. Divê em vê modelê biparêzin.”
Piştî ku rejîma Baas 8ê Kanûnê hate hilweşandin, li dora rêveberiya HTŞê nîqaş li ser Sûriyeya nû tê kirin. Dewleta Tirk hem bandora xwe ya li ser Şamê li dijî Kurdan bi kar tîne, hem jî çeteyên Artêşa Mîlî ya Sûriyeyê (SMO) ku di bin sîwanê artêşa wê de ye berê wan dide Bakur û Rojhilatê Sûriyeyê û êrîşan bi wan dide kirin. Şervanên HSDê jî zêdeyî meheke bi parastina Tişrîn û Qereqozaxê bendê datînin pêşiya plana dewleta Tirk. Zanyarê Swîsreyî, parêzvanê mafên mirovan û siyasetmedar Prof. Dr. Franco Cavalli li ser girîngî û wateya Bakur û Rojhilatê Sûriyeyê ji nûçegîhanê ANFê Serkan Demîrel re nirxandin kir. Franco Cavallî anî ziman ku modela li Rojava ji bo her kesî mînakeke awarte ye û got: “Kurdan di rewşeke gelekî zehmet de karîbûn pergaleke demokratîk ava bikin. Ev ji tevahiya cîhanê re dibe mînak.” Prof. Franco Cavalli diyar kir ku ew ji ber nêta qirkirinê ya Erdogan bi fikar e û got, “Cîhana demokratîk û pêşverû ji bo parastina Roajva divê ji niha bêhtir têbikoşe.”
‘Zimanê nerm hêzên nêzî DAIŞê zêde kiriye’
Prof. Franco Cavalli bi bîr xist ku niha li Şamê rejîmeke nû ya nêzî Tirkiyeyê rûdinê, ku beriya mehekê weke DAÎŞ’ê terorîst dihate dîtin û got, “Ev kes îro zimanekî nerm bi kar tînin, lê belê ez ji wan bawer nakim. Tişta herî xetere jî ew e ku vê rewşê bandora Îslamiyên nêzî DAIŞê zêde kiriye. Bûyerên dawî yên li Sûriyeyê hêza Erdogan zêde kiriye ku timî dibêje, her tiştên li Rojava divê bêne tinekirin.”
‘Dibe Erdogan daxwaza qirkirina kurdan bike’
Prof. Franco Cavalli bal kişand ser metirsiya li ser alîgirên demokrasiyê yên li Sûriyeyê û Kurdan û dubare kir ku ew qet bawer nake ku rejîma nû demokratîk bibe, mafên jinan an jî hindikahiyan biparêze. Prof. Cavalli bi dewamî got, “Ji ber vê yekê jî gelekî bi fikar im. Di nava 10 salên dawî de qet ewqasî bi fikar nebû bûm. Ev rewş bi taybetî xetere ye, ji ber ku Erdogan nêta xwe ya metirsîdar beriya niha bi rengekî şênberî eşkere kiribû. Dibe ku bixwaze, çawa ku beriya sed salî anîbû serê Ermenan vê carê jî Kurdan qir bike. Ji ber vê yekê jî fikarên min zêde ne.”
Prof. Cavalli anî ziman ku cîhana Rojava ji bo parastina hêza xwe ya li Rojhilata Navîn serî li her rê û rêbazê dide, pêwîstî pê bike wê qirker û mêtingeran jî biparêze û got, “Cîhana Rojava weke ku ji bîr kiriye bê rejîma li Sûriyeyê kî ye. Dibêje her tişt bi erênî dimeşe. Tişta sereke ji bo cîhana Rojava berjewendiyê wan e.”
Demokrasiya rasteqîn Rojava ye
Prof. Franco Cavalli destnîşan kir ku Rojava ku di bin êrîşên dagirkeriyê yên dewleta Tirk û çeteyên wê de ne li Rojhilata Navîn demokrasiya yekane û rasteqîn e û bang li demokratên li cîhanê hemûyan kir ku Rojava biparêzin. Prof. Dr. Cavalli got, “Yekane demokrasiya rasteqîn a li Rojhilata Navîn li Rojava ye. Li wê derê her kes, hemû hindikahî, jin, mêr xwedî mafên wekhev in. Bi dîtina min modela li Rojava dikare bibe mînak ji her kesî re. Kurdan di nava şert û mercên gelekî zehmet de pergaleke demokratîk ava kirin ku ji cîhanê re bûye mînak. Hemû hêzên demokratîk ên li cîhanê ji bo rizgarkirina ezmûna demokratîk a li Rojava divê hîn bêhtir hewl bidin. Rojava yekane ezmûna demokratîk a li Rojhilata Navîn e. Di dema dirêj de ji bo avakirina Rojhilata Navîn a demokratîk û aştiyane, modela Rojava yekane hêvî ye. Mînakeke din nîne. Diyar e ku terorîstên rastgir ji bo tinekirina vê ezmûnê wê hîn bêhtir hewl bidin, lewma cîhana demokratîk û pêşverû ji bo parastina Rojava divê ji niha û pê ve hîn bêhtir têbikoşin.”
