Amed – Endamên Komîteya Amadekar a Newroza Amedê Rûçem Vefa Elyakût û Firat Yuksektepe bang li gelê Kurd kirin ku tev li Newroza dîrokî ya Amedê bibin û wiha gotin: “Newroz ne tenê rojek e, lê roja serhildan û têkoşînê ye.”
Newroza îsal bi diruşma “Newroza Azadî û Yekîtiya Demokratîk” û “Newroza Azadî û Demokrasiyê” li gelek tax, gund, navçey û bajaran tê pîrozkirin. Yek ji van bajaran jî Amed e. Li Amedê dê di 21ê Adarê de (sibê) Newroz were pîrozkirin. Amadekariyên Newroza Amedê bi dawî bûn. Newroza Amedê dê malovaniya zêdetirî milyoneke kesan bike. Bi platforma hatiye avakirin ve pankartên weke “Newroza Azadî û Yekîtiya Demokratîk” , “Newroza Azadî û Demokrasiyê” û pankartên “Bijî Newroz” ên bi gelek zimanan hatin daliqandin.
Di Newrozê de Hevserokê DEM Partiyê yê Giştî Tûncer Bakirhan, aktivîsta TJAyê Ayla Akat Ata, siyasetmedar Leyla Zana, Çetîn Arkaş û Veysî Aktaş dê biaxivin. Her wiha Koma Agirê Jiyan, Zinar Sozdar, Alend Hazim, Dîlan Top û Erkan Top û koma govendê dê derkevin ser dîkê.
Li aliyê din tê payîn ku di pîrozbahiya Newrozê de peyama Rêberê Gelê Kurd Abdullah Ocalan a bidîmen dê bê parvekirin. Her wiha wê ji başûrê Kurdistanê, Tirkiyeyê, welatên Ewropayê jî gelek kes tev li pîrozbahiya Newrozê bibin.
Endamên Komîteya Amadekar ên Newroza Amedê Rûçem Vefa Elyakût û Firat Yuksektepe têkildarî amadekariyên li Qada Newrozê ji Ajansa Welat (AW) re axivîn û banga tevlibûna Newrozê kirin.
‘Roja Newrozê roja serhildanê, têkoşînê û berxwedanê ye’
Rûçem Vefa Elyakût derbarê amadekariyên Newrozê de wiha got: “Em niha li qada Newrozê amadekariyên dawî dişopînin. Em hewl didin ku heta roja Newrozê, amadekariyên me hemû biqedin û em bi coşeke xurt Newrozê pêşwazî bikin. Em ê bi gelê xwe, gelê Amedê û bi milyonan kesî re, li qada Newrozê ya Amedê pêşwaziyeke bi coş û kelecan bikin. Xebatên me gelek in, ev mehek zêdetir e ji bo Newrozê, li qadê amadekarî didomin. Em jî dizanin ku roja Newrozê, ne tenê rojek e ku em bibêjin cejn e. Roja Newrozê mizgîniya biharê ye, lê belê ji bo me, ji bo gelê Kurd, 21ê Adarê roja Newrozê roja serhildanê, roja têkoşînê û roja berxwedanê ye. Em jî dê di 21ê Adarê de li vir, li qada Newrozê ji bo statuya Rêberê Gelê Kurd zelal bibe, ji bo azadiya gelê Kurd û ji bo aştî û civakeke demokratîk, banga xwe bigihînin hemû cîhanê. Banga me li gelê Kurd, li gelê Amedê ye; werin bi milyonan kes em biherikin qada Newrozê.”
‘Em hemu gelên Rojhilata Navîn vedixwînin qada Newrozê’
Firat Yuksektepe jî dest nîşan kir ku zêdetirî mehek e hemû sazî û dezgeh bi coşeke mezin, amadekariya Newrozê dikin û wiha axivî: “Ji roja 1ê Adarê û vir ve hemû heval li qada ne. Ji bo xebatên nava bajêr û karên teknîkî her sibeh di neh û nîvan de, em civînê dikin. Kêmasiyên xwe em dibînin. Ji 17 navçeyên me, serê sibehê ji saet 6an ve, ji bo ku em gelê xwe yê aştîxwaz bînin qada Newrozê, me erebeyên Şaredariya Bajarê Mezin a Amedê amade kirine. Li her navçeyê ew erebeyên me yên mezin, wê gelê me li gorî wan deriyên ku me ji berê ve amade kirine, nêzî wan deriyan daxin. Bangawaziya me ev e ji gelê me re, ji bo Newroza 2026an, ji Rojhilata Navîn û ji Kurdistanê yên ku bixwaze were Newroza Amedê, em hemûyan 21ê Adarê vedixwînin qada Newrozê.”
