Platforma Ked û Demokrasiyê ya Amedê li dijî cînayetên kar daxuyanî da û got, “Mirinên ku pêşî lê nayên girtin ‘qeza’ nînin. Ew bi eşkereyî cînayetên têkildarî kar in.”
Bi pêşengiya Platforma Ked û Demokrasiyê ya Amedê li dijî cînayetên kar li ber Plazaya AZC ya Ofîsê ya navçeya Bajarê Nû ya Amedê daxuyanî hat dayîn. EMO, KESK, EGÎTÎM-SEN, TMMOB û gelek saziyê sivîl ên Amedê beşdarî daxuyaniyê bûn. Di daxuyaniyê de pankarta “Qezaya kar tune, cînayeta kar heye” hat hilgirtin. Daxuyanî ji aliyê Hevserokê Odeya Endezyarên Elekrîkê (EMO) ya Şaxa Amedê Ufuk Bulut ve hat xwendin.
Di daxuyaniyê de ev tişt hatin parvekirin:
“Li Amedê mirinên li ser kar li pey hev qewimîn. Harûn Aksel, Ahmet Şîmşek û Salîh Dagli di karê înşeatê û tamîrkirina traktoran de jiyana xwe ji dest dan. Karkerên ku jiyana xwe ji dest dane em wan ji bîr nakin. Ev cînayetên ku ji ber xemsariyê li Amedê pêk hatine, cihê şermê ne. Karker ne tenê li Amedê, li seranserê Tirkiyeyê ji ber ku tedbîr nayên girtin û cihên kar ên bêkontrol jiyana xwe ji dest didin. Ev mirinên ku pêşî lê nayên girtin ‘qeza’ nînin. Ew bi eşkereyî cînayetên têkildarî kar in.
Em li vir bi zelalî bang li rayedaran dikin:
*Divê berpirsyariyên cînaeytên kar bên darizandin.
*Divê qanûnên tenduristî û ewlehiya kar ên bibandor bên bicihanîn.
*Divê muayeneyên rast û serbixwe bên kirin.
*Divê tavilê peymana taşeron, karên neewle û bêqeyd bi dawî bibin.
*Yên ku debara xwe bi xebatê dikin, dê tu carî dev ji hesabpirsîna cînayetên têkildarî kar bernedin û daxwaza edaletê bikin. Em ê ji bo hemû karkeran têkoşînê mezin bikin.
*Navên karkerên ku li Amedê jiyana xwe ji dest dane dê di têkoşîna me de bijîn. Hêza keda rêxistinkirî û hevgirtî dê vê pergalê biguherîne.
Em dixwazin bijîn.”
