Amed – Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk’ kir. Piştî bangê şer sekinî. Li gorî daxuyanî û nûçeyên malperan piştî banga Abdullah Ocalan 26 gerîla û leşkeran jiyana xwe ji dest daye. Di sala 2024an de jî 287 gerîla û leşkeran jiyana xwe ji dest dabû.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kiribû. Ji wê rojê heta niha di 9 mehên dawî de 26 gerîla û leşkeran jiyana xwe ji dest daye. Li gorî daxuyaniyên PKK û TSKê di sala 2024an de 287 gerîla û leşkeran jiyana xwe ji dest daye. Li gorî daneyên TSKê û nûçeyan di sala 2024an de bi giştî 84 leşkeran jiyana xwe ji dest daye. Di nav wan de 39 leşkeran li qada şer jiyana xwe ji dest daye.
Serokê MHPê Dewlet Bahçelî di 1ê Cotmeha 2024an de li Meclisê çû cem koma DEM Partiyê û silav da Hevserok û wekilên DEM Partiyê. Devlet Bahçelî got “Em dikevin serdemeke nû. Dema em ji bo cîhanê aştiyê dixwazin, divê di serî de em aştiya navxweyî pêş bixin.” Gotinên Devlet Bahçelî li Tirkiyeyê bû rojeva sereke. Devlet Bahçelî piştre di 22yê Cotmehê de di koma partiya xwe de bang li Rêberê Gelê Kurd Abdullah Ocalan kir ku bê li Meclîsê biaxive.
Piştî 3 sal û 7 mahan hevdîtina yekem
Parlamenterê DEM Partiyê yê Rihayê Omer Ocalan di 14ê Tebaxê de ji bo hevdîtina bi Abdullah Ocalan re serî li Wezareta Dadê dabû. Omer Ocalan di 23yê Cotmehê de çû Îmraliyê. Ev hevdîtin piştî 3 sal 7 mehan pêk hat. Abdullah Ocalan di peyama xwe de got ‘Tecrîd berdewam dike. Heke şert û merc ava bibin, hêza min heye ku ez pirsgirêka Kurd ji zemîna şer û pevçûnê veguherînim ser bingeha hiqûq û siyasetê. Ez xwedî vê hêza teorî û pratîk im.’
Di 27ê Sibata 2025an de şandeya Dem Partiyê ya ku ji Ahmet Turk, Pervîn Bûldan, Sirri Sureyya Onder, Tulay Hatimogulları, Tuncer Bakirhan, Cengiz Çiçek û Faik Ozgur Erol pêk dihat çû Îmraliyê û bi Rêberê Gelê Kurd Abdullah Ocalan re hevdîtin kir. Piştî hevdîtinê Şandeya DEM Partiyê, banga Aştî û Civaka Demokratîk ya Rêberê Gelê Kurd Abdullah Ocalan ji raya giştî re aşkere kirin. Rêberê Gelê Kurd Abdullah Ocalan di bangê de xwest ku PKK xwe fesix bike û dawî li şerê çekdarî bîne.
Kongreya dîrokî ya PKKê
Piştî banga Rêberê Gelê Kurd Abdullah Ocalan PKKê di 1ê Adarê de agirbesta yekalî rqagihand. Di 5-7ê Gulanê de Kongreya xwe ya 12emîn li darxist. Di 12ê Gulanê de PKKê encama 12emîn kongreya xwe aşkere kir. PKKê diyar kir ku li ser banga Rêberê Gelê Kurd Abdullah Ocalan di 5-7ê Gulanê de li du qadên cuda kongre pêk anîye û biryara fesixkirina PKKê û berdana çekan daye.
Merasîma bi heybet
Di 11ê Tîrmeha 2025an de 30 gerîlayên PKKê bi merasîmeke bi heybet li Şikefta Casanayê ya li Silêmaniyê çek şewitandin. Di 26 Cotmehê de Rêveberiya Tevgera Azadiyê daxuyanî da û diyar kir ku wan dest bi vekişîna hêzên xwe yên li Tirkiye û bakurê Kurdistanê kiriye.
Banga Aştî û Civaka Demokratîk
Piştî banga Rêberê Gelê Kurd Abdullah Ocalan “Aştî û Civaka Demokratîk” ya 27ê Sibatê şerê di navbera PKKê û Hêzên Çekdar ên Tirk (TSK) sekinî. Rêberê Gelê Kurd Abdullah Ocalan bi banga xwe pêşî li mirina leşker, polês û gerîlayan girt.
Li gorî daxuyaniya PKKê di sala 2024an de 203, di sala 2025an de 50 gerîlayên PKKê jiyana xwe ji dest dane. Piştî banga Rêberê Gelê Kurd Abdullah Ocalan ya 27ê Sibatê ya “Aştî û Civaka Demokratîk” 11 gerîlayên PKKê jiyana xwe ji dest dan.
Mirina gerîla û leşkeran da sekinandin
Li gorî daneyên TSK û nûçeyan di sala 2024an de bi giştî 84 leşkeran jiyana xwe ji dest daye. Di nav wan de 39 leşkeran li qada şer jiyana xwe ji dest daye. Di sala 2025an de bi giştî 40 leşkeran jiyana xwe ji dest daye. Di sala 2025an de 20 leşkeran li qada şer jiyana xwe ji dest daye. Piştî banga Rêberê Gelê Kurd Abdullah Ocalan ya 27ê Sibatê 15 leşkeran jiyana xwe ji dest daye, ji van 15 leşkeran 12an bi gaza metanê ya jehrî jiyana xwe ji dest dabûn.
Piştî banga Rêberê Gelê Kurd Abdullah Ocalan ya 27ê Sibatê vir ve 26 gerîla û leşkeran di qada şer de jiyana xwe ji dest daye. Li gorî daxuyaniyên PKK û TSKê di sala 2024an de 287 gerîla û leşkeran jiyana xwe ji dest daye. Ev jî derdixe holê ku banga Rêberê Gelê Kurd Abdullah Ocalan mirina leşker, polês û gerîlayan sekinandiye. Di mehên dawî de ne gerîlayên PKKê ne jî leşkerên Tirk jiyan xwe ji dest dane.
