Rejîma Îranê di sala 2025an de herî kêm 1639 kes bi darvekir. Rêxistinên mafên mirovan, ragihandin ku ev hejmar di nava deh salên dawî de asta herî bilind e û diyar kirin ku dê ev hejmar zêdetir be.
Li gorî daxuyaniya hevpar a Rêxistina Mafê Mirovan ya Îranê (Iran Human Rights- IHR) û Li Dijî Cezayên Darvekirinê Em Tev bi Hevre ne (Ensemble contre la peine de mort), hejmara darvekirinan li gorî sala bihurî ji sedî 68 zêdetir bûye û gihîştiye 1639 kesan. Li gorî vê hejmarê di rojekê de herî kêm 4 kes hatine darvekirin û ji sala 1989an û vir ev dane asta herî bilind e.
48 jin hatin darvekirin
Li gorî raporê, 48 jin hatine darvekirin, ku ev hejmar di 20 salên dawî de hejmara herî zêde ye. Rêxistinên mafên mirovan, dibêjin ku darvekirin ji bo zextên siyasî û kontrola civakî têne bikaranîn. Rêveberê IHRê, diyar kir ku rayedar hewl didin bi avakirina atmosfera tirsê xwepêşandanan bitepisînin. Rêxistina Efûyê ya Navneteweyî, jî diyar dike ku Îran li gorî nifûsa xwe yek ji wan welatan e ku hejmara herî zêde ya darvekirinan lê tê sepandin.
Girtiyên xwepêşandêr bi darvekirinê re rubiru ne
Di raporê de hatiye diyarkirin ku bi sedan kesên di destpêka sala 2026an de beşdarî xwepêşandanan bûne, hîna jî di nava xeteriya darvekirinê de ne. Hat gotin ku ev xwepêşandan bi awayekî hovane hate çewisandin, bi hezaran kes jiyana xwe ji dest dan û bi deh hezaran kes jî hatin binçavkirin.
Herî zêde Kurd û Belûc hatin darvekirin
Di raporê de hat destnîşankirin ku Kurd û Belûc di nav kesên ku hatine darvekirin de zêde ne. Rêxistinên mafên mirovan, di rapoara xwe de da zanîn ku di krîza heyî de darvekirin dikarin zêde bibin û bang li civaka navneteweyî kirin ku nerazîbûnên xwe nîşan bidin.
