Amed – Bi pêşengiya TJAê di 19ê Nisanê de li Gemlîkê ji bo azadiya fizikî ya Rêberê Gelê Kurd Abdullah Ocalan meşek dê bê lidarxistin. Endamên MEBYA-DERê Makbûle Açikgoz û Guler Sevîktek ji bo meşa Gemlîkê ev bang kirin: “Divê jin li Serokê xwe xwedî derkevin. Heta Serokatî azad nebe, em azad nabin. Divê meşa Gemlîkê bibe wesîleya azadiya Serokatî.”
Tevgera Jinên Azad (TJA) ji bo azadiya Rêberê Gelê Kurd Abdullah Ocalan bi dirûşmeya “Dem dema azadiyê ya jinan û azadiya Rêber Apo ye” di 19ê Nîsanê de ber bi Gemlîk a Bursayê ve dê meşekê li dar bixe. Dê jin ji bo azadiya Rêberê Gelê Kurd Abdullah Ocalan ji gelek bajarên bakurê Kurdistanê û Tirkiyeyê berê xwe bidin Gemlîkê û li wir bi meşê dengê xwe derxînin. Yek ji van bajaran jî Amed e. Jin dê li di 18ê Nîsanê de li Qada Şêx Seîd ya Amedê kom bibin û ber bi Gemlîkê ve bi rê bikevin. Jinên ku ji bo tevlibûna meşê xebatan dimeşînin banga tevlibûnê jî dikin. Endam û rêveberên Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Amedê Makbûle Açikgoz û Guler Sevîktek têkildarî girîngiya meşê ji ajansa me re axivîn.
‘Serokatî di her warî de rêya jinan vekir’
Endama MEBYA-DERa Amedê Makbûle Açikgoz, bal kişand ser rola Abdullah Ocalan a di azadiya jinê de û diyar kir ku her destkeftiyeke jinan bi saya ramanên wî pêk hatiye. Açikgoz wiha got: “Serokatî çavê jinan vekir û di her warî de rê li ber wan vekir. Berê jin di nava malê de û di civakê de nedihatin dîtin, lê îro jin bi saya Serokatiyê azad bûne. Ji ber vê yekê divê jin li Serokê xwe xwedî derkevin. Heta Serokatî azad nebe, em azad nabin.”
‘Azadiya Serokatiyê rûmeta dinyayê û xilasiya Kurdan e’
Makbûle Açikgoz, bang li temamê gelê Kurd, bi taybetî li dayik, jin û ciwanan kir ku ji bo Meşa Gemlîkê şiyar bin û wiha pê de çû: “Ev rê, rêyeke pîroz e. Divê em li malên xwe nerûnin. Çawa ku me 8ê Adarê û Newroz pîroz kirin, divê em di 19ê Nîsanê de jî ber bi Gemlîkê ve herin. Azadiya Serokatî rûmeta dinyayê û xilasiya Kurdan e. Divê meşa Gemlîkê bibe wesîleya azadiya Serokatî.”
‘Bila 19ê Nîsanê bibe dengê azadiyê’
Rêvebera MEBYA-DERa Amedê Guler Sevîktek jî piştgirî da bangawaziyê û destnîşan kir ku çareseriya pirsgirêka Kurd û xilasiya gelan di destê Abdullah Ocalan de ye. Guler Sevîktek diyar kir ku divê ev pêvajo bi başî biçe û bang kir ku her kes ji bo aştiyeke mayînde û azadiya fîzîkî ya Rêberê Gelê Kurd Abdullah Ocalan, di 19ê Nîsanê de bibe dengê azadiyê û berdewama axaftina xwe de wiha got: “Tirk dibe, Kurd dibe, kî dibe bila guh bide vê pêvajoyê, bila ev pêvajo bi başî biçe. Bila girî venegere. Bila her kes destê xwe têxe bin kevir, ne ku tenê destê xwe em têxin bin kevir, bila laşê xwe têxin bin kevir, bila ji vê pêvajoyê, pêvajoyeke xweş derkeve. Bi hêla Serokatiyê ve tiştekî xweş jê derkeve.”
