Amed – Welatiyê bi navê Remzî Cînakli ku 45 sal in kare tableyê dike, li navçeya Sûrê ya Amedê ji bo debara xwe bike rêvas, kereng, gulik û nokan difiroşe.
Rêvas an ribês, gulik û kerengên li Kurdistanê pir tên hezkirin, şîn dibin û li gelek deveran tên firotin. Li bakurê Kurdistanê welatî nebatên weke rêvas, kereng, gulik û nokan bi kedeke zêde kom dikin û tînin li ser dezgehan difiroşin.
Welatiyê bi navê Remzî Cînakli jî li navçeya Sûrê ya Amedê bi hevjîna xwe re li ser tableya xwe nebatên weke rêvas, kereng, gulik û nokan difiroşe. Remzî Cînakli da zanîn ku 45 sal in li ser tableyê li gorî demsalê nebatan, sebze û fêkiyan difiroşe û bi vî şeklî debara mala xwe dike. Remzî Cînakli da zanîn ku kereng ji çiyayên Bedlisê ji wan re tên û diyar kir ku ribês û gulik jî ji gelek bajarên Bakurê Kurdistanê şîn dibin. Remzî Cînakli da zanîn ku ev nebat bi rêya nasên wan ji wan re tên û her wiha nokan jî difiroşe. Giyafiroş kîloya kerengan 150 lîreyan, ya rêvasan 200 lîreyan, ya gulikê 60 lîreyan û baxê nokan jî bi 30 lîreyî difiroşin.
45 sal in debarê bi firotina nebatan dike
Remzî Cînakli bi lêv kir ku çinandina gulik, kenger û ribês pir zor e û wiha got: “Em bi telefonê li mirovên xwe digerin. Ew ji me re van nebatan dişîşnin. Ribês ji bo nexweşiya şekerê û gelek nexweşiyên din baş e. Her wiha kereng û gulik jî ji bo tenduristiyê gelek baş in. Îsal giya baş tên firotin. Vî karî ji bo debara xwe dikin. Ji xwe tenê vî karê tableyê dikim. Wekî din nikarim tu karên din bikim. Dema giya diqede ez fêkî û sebze difiroşim. 45 sal in vî karî dikim.”
