Enqere – Şagirt û hevalê Huseyîn Aykol rojnameger Serdar Altan diyar kir ku oxirkirina koça dawî ya mamosteyê Çapemeniya Azad ne xatir xwestinek bû û got: “Bi nirxên ava kirinê dê bi me re bijî. Ji bo wê jî em nikarin bêjin em xatir jê dixwazin.”
Mamosteyê Çapemeniya Azad rojnameger û nivîskar Huseyîn Aykol di 14ê Cotmehê de li mala xwe ya li Enqereyê, xwîn çûbû ser mejiyê wî û rakiribûn Nexweşxaneya Perwerde û Lêkolînê ya Sîncanê. Huseyîn Aykol ku 77 rojan li beşa çavdêriya awarte dihat dermankirin jiyana xwe ji dest da. Huseyîn Aykol ji aliyê heval û hogirên xwe bi merasîmeke hat oxirkirin. Ji bo Huseyîn Aykol li şaxa Komeleya Mafên Mirovan (ÎHD) a Enqereyê şîn hat danîn. Şîn dê di roja 3an de bidome. Serdan ji aliyê malbat û hevalên Huseyîn Aykol ve tên qebûl kirin. Ji bo Huseyîn Aykol serdanên şînê didome.
Huseyîn Aykol 36 salan bê navber kedeke mezin da Çapemeniya Azad. Bi hezaran şagirt gihand. Şahidiya demên zor û zahmet kir. Di demên herî dijwar de li berxwe da. Hevalê Apê Mûsa û Gurbetelî Ersoz bû. Pêşengê Çapemeniya Azad Huseyîn Aykol di heman demê de dengê girtiyên siyasî bû. Dema li nexweşxaneyê dihat dermankirin jî ji girtîgehan bi sedan name ji Huseyîn Aykol re dihatin. Heval û Şagirtê Huseyîn Aykol Serdar Altan û nûnerê Federasyona Komaleyên Hiqûq û Piştevaniyê ya Malbatên Girtî û Hukumxwaran a Medê (MED-TUHAD-FED) a Enqereyê Mehmet Baytekin li şîna Huseyîn Aykol qala têkoşîna wî kirin û hestên xwe anîn ziman.
‘Nirx û berhemên hiştine dê rêya me ronî bike’
Rojnameger Serdar Altan anî ziman ku Huseyîn Aykol ji bo Çapemeniya Azad kedeke mezin da ye û ev tişt gotin: “Têkoşîna wî li ber çavan e. Nirxên ava kirine li ber çavan e. Weke kesayet ji bo Çapemeniya Azad heviyek bû. Têkoşîna wî heviyek ava kiribû. Bi saya wê têkoşînê Çapemeniya Azad xurt e. Mamostê Huseyîn hem ji bo me rojnamegeran mînakek bû û hem jî ji bo civakê mînakek bû. Ew dilnizmiya wî, şoreşgeriya wî mînak bû. Merivekî Sosyalîst bû. Wisa li civakê dinêrî. Dema me oxir kir jî bi sedan kesan ev bi rêkir. Di axaftinan de jî xuya bû ku nirxeke giranbiha ava kir û mîrateyeke mezin li dû xwe hişt. Ji bo nexatirxwestinek bû. Li dû xwe gelek berhem û şagirt hiştin. Bi nirxên ava kirine dê bi me re bijî. Ji bo wê jî em nikarin bejin em xatir jê dixwazin. Nirx û berhemên hiştine dê rêya me ronî bike. Em xemgînin. Lê ji bo ku me ew nas kir û hevaltî kir kêfxweş in. Nirxên avakirine ji bo me şanaziyek e.”
‘Huseyîn Aykol di serî de hevalê Serokatî bû’
Nunerê MED-TUHAD-FEDê ya Enqereyê Mehmet Baytekin jî bi lêv kir ku ew 30 sal in Huseyîn Aykol nas dike û wiha qal kir: “Me ew di nava çapemeniyê de nas kir. Em rojên dijwar de derbas bûn. Hevalên wî hatin kuştin û rojname dihat bombekirin. Lê heval Huseyîn di wan rojên zahmet de roleke mezin girt ser milên xwe. Bi kedeke mezin Çapemeniya Azad bi hevalên xwe re pêşxist. Huseyîn Aykol di serî de hevalê Serokatî bû. Pir dixwast bi Serokatî re hevpeyvînê bike. Berê jî kiribû. Hevalekî pir zîrek bû. Em bawerin şagirtên çapemeniya azad dê kar û xebatên wî pêşbixînin û keda Huseyîn Aykol erdê nahêlin. Bi hezaran şagirt gihandin û ji bo wê jî kêfxweş in.”
