Şaredariya Rêya Armûşê bi boneya 15ê Gulanê Cejna Zimanê Kurdî polên xwe yên perwerdeyê zêde kir.
Şaredariya Rêya Armûşê ya Wanê, di 15ê Gulanê Cejna Zimanê Kurdî de ji bo xurtkirina hişmendiya şaredartiya pirzimanî, gaveke girîng avêt. Şaredariyê, beriya niha di 21ê Sibatê Roja Zimanê Dayikê de bi gerînendeyên şaredariyê re perwerdehiyên Kurdî dabû destpêkirin. 15ê Gulanê jî ji bo xebatkarên şaredariyê polên nû yên bêpere hatin vekirin û xebatên ziman berfirehtir kirin. Perwerdeyên Zimanê Kurdî dê ji aliyê Komeleya Pêşvebirina Çand û Zimanê Kurdî (KURDÎGEH) ve bê dayîn. Şagirtên ziman, bi kelecaneke mezin tevlî polê bûn. Her wiha Hevşaredar Canan Ûzûnay, wekîl û endamên meclîsê û gerînendeyên şaredariyê beşdarî vekirina pola perwerdeyê bûn.
‘Hewceye em jiyana xwe bi zimanê xwe bijîn’
Hevşaredar Canan Ûzûnay di vekirina polê de Cejna Zimanê Kurdî pîroz kir û got: “Îro 15ê Gulanê ye. Cejna Zimanê Kurdî li me hemûyan pîroz be. Bi rastî jî têkoşîna me bi salane li ser ziman diçe. Di têkoşîna ziman de gelek hevalên me canê xwe dan ku em li ser axa xwe, di jiyana xwe de zimanê xwe biparêzin. Em wê derê wan hevalên xwe yên jiyana xwe dest dane bi bîr tînin. Hewceye ku em jiyana xwe her tim bi zimanê xwe bijîn. Em spasiya KURDÎGEHê jî dikin ku îro em bi hev re ne. Em di vê şaredariyê de ne bi zimanekî, bi pirzimanî xizmetan didin. Me bi perwerdekirina gerînendeyan ev pêvajoye dabû destpêkirin û me ji bo 15ê Gulanê jî ev plansaziye kiribû ku hemû xebatkarên me jî hînî ziman bibin. Divê ku ev bibe destpêkek û em hemû qadên şaredariyê de xizmetan bi pirzimanî bidin.”
Piştî axiftina Hevşaredar Canan Ûzûnay, mamosteya KURDÎGEHê Arîfe Aslanê axivî. Mamoste Arîfe Aslan, bal kişand ser Cejna Zimanê Kurdî û ev tişt anî ziman: “Ez roja we ya Cejna Zimanê Kurdî pîroz dikim. Hevî dikim em rojên wiha xweşik bi hev re bibînin. Sedema min a hatina vê derê ev e ku em bi hev re zimanê kurdî hîn bibin. Tevlî buna we ji bo me pîroz e.”
Piştî axaftinan, xebatkarên şaredariyê kirin du beş û du polên perwerdehiya kurdî hatin vekirin. Yên ku qet kurdî nezanin û yên bingeha ziman heyî dê di polên cuda de perwerdehiyê wergirin.
